Shillong, Lber 03:
Kawei ka ophis treikam kaba don ha ka Dong Nongrimbah, Laitumkhrah, Shillong ka la suba shah wiang ding ha ki briew ki bym ithuh satia ha ka miet Sngi Thohdieng.
Katei ka jingjia ka la jia ha ka por mynmiet bad ïa katei ka ophis la tip kyrteng kum ka Meda Infrastructures Private Limited Information.
Katei ka ophis ka dei ka kompeni kaba khmih ïa ki kam tei jingtei mynta la 12 snem ha kaba ka Kong Anastasia Kharlyngdoh ka long kum ka Board Member bad u Bah Methodius Dkhar uba dang shu dep jop ïa ka ilekshon na Mawshynrut konstitwensi na ka seng HSPDP u long kum u Director.
“Katei ka ophis ka don ha ka Dong Nongrimbah bad katei ka jingjia ka la jia ha ka por kumba 10 baje duna eiei mynmiet,” la ong u Rangbah Shnong ka Laitumkhrah, Bah Andrew A. Jyrwa haba kren bad u nongthoh khubor.
U la ïathuh ba haduh mynta, ki pulit ki dang pynlong ïa ka jingtohkit halor katei ka jingjia.
“Ki ong ba ki ïohi ïa katto-katne kiba mareh hadien ka jinging jong katei ka ophis. Ki pulit ki dang pynlong ïa ka jingtohkit halor kane,” la ong u Bah Jyrwa.
U la ong ruh ba katei ka ophis kaba la buh da u Bah Methodius Dkhar ha katei ka jaka ka dei kaba khmih ïa ki kam tei jingtei.
“Ki tiar kiba la ing ne julor ki kynthup ïa ki tiar ophis,” u la ong.
Haba ïadei bad katei ka jingjia, ki pulit pynlip ding ki la wan poi ha katei ka jaka ban tem ïa ka ding.
Kum ban shu kdew hangne, kane ka leit jia ryngkhat ruh hadien ba u Bah Dkhar uba la shah jied kum u nongmihkhmat sha ka ïingdorbar thawaiñ u la leit ban ai jingkyrshan ïa ka kynhun NPP ban thaw Sorkar.
