Shillong, Lber 05:
U kyrtong ka UDP na Sohra konstitwensi, u Bah Titos Chyne, u la ong ba lada ka shlem treikam jong u SDO Sohra Civil Sub Division kim lah ban ñiew biang ïa ka vote ha katei ka konstitwensi um banse ban hap ujor sha ka Election Commission ka ri India ne sha ka ïingbishar ban ïoh ïa ka jingbishar kaba hok.
U la ong ka jingshah rem ka jong u da 15 vote ha u kyrtong ka PDF ha Sohra konstitwensi ka dei ka bym lah ban mutdur namar ki don ki polling station kaba u don jingartatien, dei na kata ka daw ba u kwah ban phah ñiew biang ïa ki vote.
Kum ban shu pynkynmaw, haba u Bah Titos u sngew artatien hadien ba la dep ñiew vote, u la thoh shithi sha u Chief Electoral Officer (CEO) ka jylla ban phah ñiew vote biang bad u Joint Chief Electoral Officer u la phah da ka jingthoh sha u SDO (Election) Sohra Civil Sub Division ban khot ïa ka jingïalang bad u kyrtong uba la ujor.
Haba ïakren bad u Bah Titos u la ïathuh ba haduh mynta ka shlem treikam jong u SDO Sohra Civil Sub Division kam pat khot ïa kata ka jingïalang ban pynbeit ïa katei ka kam.
Nangta u la ïathuh hadien ba la dep ñiew vote, ki election agent ha ka jingbym poi pyrkhat kumba shoh tyndep ki la mih noh na ka jaka ñiew vote.
“Haba nga la shah rem da 15 vote, kum u kyrtong ryngkat ki nongkyrshan ngim sngewhun namar haduh ka kylla ba hynriew nga tam ma nga haduh 437 vote, hynrei ha ka kylla ba hynñiew, nga shah tam tang 11 vote bad 4 vote nga shah tam ha ka postal ballot, dei na kane ka daw nga kwah ban ñiew biang” u la ong.
Namar kata, u la ïathuh ba ynda ka tnat ilekshon u SDO Civil ka la khot ïa ka jingïalang un sa kdew ïa kita ki polling station kiba u kwah ban ñiew biang.
