Shillong, Lber 05:
U Bah Donkupar Sumer u la ong ba ka jingshah rem u kyrtong ka UDP na Umsning konstitwensi ka daw baroh ka dei namar ka UDP ka la pynduh tiket ïa u tang namar ba wan u heh spah.
Kum ban shu pynkynmaw u Bah Donkupar u dei u President ka UDP Umsning circle, u la hap ban mih noh ban leit pynïasoh sha ka NPP namar ba ki la pynduh tiket ïa u hadien ba la wan rung da u Bah Sunshine Makri.
U Bah Donkupar u la kynnoh ba ka UDP Sengkmie ka sngap tang ïa u Bah Donbok Khymdeit marwei kaba la pynlong ïa ka UDP ba kan liem ha Umsning konstitwensi; hynrei ïa u, uba la shakri ïa ka konstitwensi ki la kyntait noh.
“Lada ngin ïatreilang nga don jingkyrmen ba ka UDP ha Umsning ka la ïoh beit ïa ka jingjop, hynrei namar tang ba wan ki heh spah ki kyntait noh ïa nga” u la ong.
Nalor kata, u la pynshai ruh ba ka jingrem noh u kyrtong ka NPP u Bah Jason Mawlong ha kane ka ilekshon ka dei namar ka jingmih kynsan u kyrtong ka VPP kaba don ïa ka shap u prah ka la tan lut ïa ki vote jong ka NPP.
Ha kajuh ka por u la ong ba ka jingrem u kyrtong ka NPP ka dei namar ba u la rung slem palat sha ka NPP ha kaba ka por ka la lyngkot ban leit pynshai sha ki paidbah.
U Bah Donkupar u ai jingïaroh ruh ïa u Bah Ardent Basaïawmoit uba dei u nongïalam jong ka VPP, wat la khlem don pisa; hynrei u kyrtong ka VPP ha Umsning u khlaiñ bha, katba u nongïalam ka UDP Bah Metbah um lah ban khring ïa ki paidbah kumba lah u Bah Ardent.
