Aizawl, Lber:
U Myntri Rangbah jong ka jylla Mizoram, u Zoramthang ha ki khyndiat sngi kiba la leit noh u la ïathuh ba ka jingpyntreikam ïa ki skhim kiba ïadei bad ka jingpynbiang ïa ki lad jingsumar na ka bynta ka koit khiah ka dei kawei na ki prokram kaba kyrpang tam jong ka sorkar jylla kaba la pyntreikam hapoh ka prokram Socio-Economic Development Policy (SEDP).
Ha ka jingai jingkren hapoh Ïing Dorbar Thaw Aiñ, na ka liang u Myntri Rangbah u la ïathuh ba ka sorkar ka jong u tad haduh kane ka kynti ba mynta ka la lah ban pyllait ïa ka mang tyngka kaba haduh T.150 klur hapoh ka SEDP na ka bynta ban pyntreikam ïa ki skhim pynbiang lad jingsumar ha ki snem mang tyngka naduh u 2019.
Haba ai jubab hadien ka jingshah kylli jingkylli ha u nongïalam ka Congress (Zodintluanga Ralte), na ka liang u Zoramthanga u ba dei ruh u Myntri u ba bat ïa ka tnat Planning & ProgrammeImplementation u la pyntip ba hapoh ka SEDP, ka sorkar jylla ka la pyllait T.10 klur ha u snem 2020-21, T.10 klur ha u snem 2021-22 bad T.20 klur ha u snem 2022-23 na ka bynta ban pyntreikam ïa ka Mizoram State Health Care Scheme (MSHCS). U la ïathuh shuh shuh ba na ka liang ka sorkar jylla ka la pan ruh ïa ka ram (loan) kaba haduh T.1,000 klur na ka Asian Development Bank (ADB) ban pyntreikam ïa ki skhim kiba ïadei bad ka jingpynbiang ïa ki lad jingsumar ha jylla. U la ïathuh ba ïa katei ka sienjam ban shim ïa ka ram la dep ban mynjur da ka Sorkar Pdeng, ka ban siew ïa T.720 klur bad ka sorkar jylla pat kan siew ïa ka T.280 klur kaba sah.
Hapoh ka skhim MSHCS, na ka liang ka sorkar jylla ka pynbiang ïa ki lad jingïarap haduh T.2 lak sha ki nongïohmyntoi ha ka shi snem.
Haba phai sha kawei ka khubor pat la ïathuh ba dang ha ki khyndiat sngi kiba la leit noh, na ka liang u Myntri ka Tnat Koit Khiah jong ka jylla – Dr. R. Lalthangliana u la pyntip ha Ïing Dorbar Thaw Aiñ ba na ka liang ka sorkar jylla kam pat shym la lah siew ïa ki bill (medical) kiba la kot shaduh ka T.66.2 klur sha ki 23,421 ngut ki nongïoh myntoi. U la ïathuh ba kitei ki ‘bill’ ki la sahteng naduh u bnai Risaw jong u snem 2021.
