Shillong, Lber 05:
Lai ngut ki MLA barim kiba ïakhun kum ki kyrtong na ka United Democratic Party (UDP) ki khlem lah ban jop ha kane ka ilekshon MLA, 2023 katba 2 ngut ki la shahjied biang kum ki dkhot ka Ïingdorbar Thawaiñ kaba khatwei ka Jylla.
Ki ar ngut kiba shahjied biang kum ki MLA ki long u Bah Mayralborn Syiem na Nongpoh konstitwensi uba la leit pynïasoh sha ka UDP na ka Congress, bad u Bah Renikton Lyngdoh Tongkhar na Mawkyrwat konstitwensi uba la leit pynïasoh sha ka UDP na ka HSPDP.
Hynrei ki lai ngut ki MLA barim kiba khlem lah ban jop, ki long u Bah Lambor Malngiang na Nongkrem konstitwensi uba la iehnoh kum u MLA shimet bad rung sha ka UDP, nangta u Bah PT Sawkmie na Mawlai konstitwensi uba la phet na ka Congress bad leit rung sha ka UDP, bad u Bah Shitlang Pale na Sutnga-Saipung konstitwensi uba la phet na ka TMC bad leit sha ka UDP.
Napdeng kine ki lai ngut ki khlem jop, u Bah PT Sawkmie u dei uba la rem la ar sien haba u ïakhun kum u kyrtong ka UDP na Mawlai konstitwensi.
Ha ka ilekshon MLA ha u snem 2008, u Bah PT Sawkmie u la iehnoh ïa ka Meghalaya Democratic Party (MDP) bad leit ïakhun noh na ka UDP, hynrei u la rem kput ha u Bah Founder Strong Cajee uba la shahjied kum u MLA ka Congress na Mawlai.
Ha kane ka ilekshon MLA 2023 ruh, u Bah PT Sawkmie u la iehnoh ïa ka Congress, ka seng kaba u la shahjied kum u MLA ka Mawlai ha u snem 2018, bad ïakhun noh kum u kyrtong ka UDP, ha kaba u la rem kput biang bad wan balai syndon.
