Ka NPP ka sngewthuh ba ka VPP ka dei ka seng kaba jwat ban ïakhun: Ardent

U la ong ruh ba lada hap ban shong ha ka liang pyrshah, ka seng kan leh ïa kata, hynrei kan ym kynriah pat na ka nongrim jong ka. 

Shillong, Lber 05:

U nongïalam ka Voice of the People Party (VPP), Bah Ardent M. Basaïawmoit u la ong ba ka National People’s Party (NPP) ka pyrshang ban pynthame ïa ki paidbah namar ka sngewthuh ba ka VPP ka dei ka seng kaba jwat ban ïakhun.

“Nga kwah ban pynsngewthuh ïa kito ki ’riew wohdong wohnia kiba pyrshang ban pynthohbria ïa ka VPP ba ka ïatreilang bad ka TMC…na bynta kito, nga da kyrpad ïa ki ba kin da pule bad peit bha ïa ki jinglong-jingman namar ka dei ka jingleit kyrshan ïa ka UDP kaba dei ka seng ’riewlum ka ban ïalam ïa ka Sorkar bad kam dei ka jingleit kyrshan ïa ka TMC,” la ong u Bah Basaïawmoit.

Haba kdew ba ki paidbah ki dei ban bishar bha ïa kiba kum kitei ki jait briew ne kynhun, u la ong, “Ka NPP mynta ka la sngewthuh ba ka dei tang ka VPP ka seng kaba jwat kaba kin hap ïakhun. Na kata ka daw ki pyrshang ban pynthame ïa ki paidbah da kaba ong ba ka seng ka don ka jingïadei bad ka TMC.”

Na ka liang utei u nongïalam u la kren shai ba lada long katba long ne jia katba jia, ka seng kan ym lah ban ïatreilang bad ka NPP kaba la synshar bym hok ïa ka Jylla ha kine ki 5 tylli ki snem ba la dep.

U la ong ruh ba lada hap ban shong ha ka liang pyrshah, ka seng kan leh ïa kata, hynrei kan ym kynriah pat na ka nongrim jong ka. 

Halor ka jingleit ai jingkyrshan jong ki seng ’riewlum, u la ong, “Ki nongkyrshan ka VPP kim donkam ban artatien ïa ngi, ngin ym shukor ne shet kylla ïa ki, ngin ïaineh ha ka nongrim bad ngi kyrpad ba kin ai ka jingkyrshan ïa ngi da kaba buh ïa ki jingduwai ba kyrpang ba ngin ïaid ha kine ki 5 snem hapdeng ki jingeh kiba bun ryngkat u paidbah bad ki nongrim kiba skhem jong ngi.”