Doha, Qatar, Lber:
U nongialam jong ka United Nations (UN) u Antonio Guterres ha ka Sngi Saitjaiñ u la ther pyrshah ia ki ri ba heh spah jong ka pyrthei ha kaba u la ong ba kitei ki ri kiba la bit- la biang ialade, kim pyrkhat shuh ia ka ioh ka kot jong kiwei pat ki ri kiba dang duk bad ba dang rit. Namarkata, kitei ki ri ki shu pynkiew bad thlieh dor ia umphniang bad kumjuh ruh ha kiwei ki liang kiba bun, khlem da pyrkhat bad sngewthuh ia ka bor jong ki ri ba rit- ba ria.
U Guterres u la ban jur ruh ba baroh kito ki ri kiba la kham bit- kham biang, ba ki dei ban pynmih kyrpang kumba $500 Billion ha ka shi snem, kum shi bynta ban ioh ban iarap ia kito ki ri kiba dang duna bun ha ki liang baroh, khnang ba kan iarap ban kyntiew lem ia ka ioh ka kot jongki kumba long lem kiwei pat ki ri kiba la bit la biang.
La ong ba ka jingiakynduh lang jong kumba 46 tylli ki ri kiba la kham bit kham biang (Least Developed Countries ‘LDC’) la ju pynlong ha man ka 10 snem, hynrei katei ka jingiakynduh lang ka la sangeh noh shipor naduh ba wan ka khlam Coronavirus ha kine ki 3 snem ba la leit.
Kumta ruh la ong ba ka Afghanistan bad ka Myanmar, kiba long ki 2 tylli ki ri napdeng ki ri kiba duk tam ha ka pyrthei, kim shym lah ban iadon lang ha katei ka jingialang ba la pynlong ha Doha namar ba ia ka sorkar jongki ym pat shym la pynithuh da ki dkhot jong ka UN.
Ym shym don ruh uwei napdeng ki nongialam jong kito ki ri kiba la bit la biang bha, u ban iadon lang ha katei ka jingialang.
