Jowai, Lber 05:
Ki ’riewngeit ka Balang Presbyterian ha ka Sngi U Blei ki la wan poi sha ka Jingïaseng Samla jong ka KJP Synod Mihngi kaba Arphew-wei (XXI) kaba la long ha ka Balang Presbyterian Moodymmai Neiñ, Moodymmai District, Wahïajer Moodymmai Presbytery halor ka phang “Ïengskhem bad Longshlur”.
Kane ka jingïaseng ka la sdang naduh ka 3 tarik bad kut ha ka Sngi U Blei. Ha ka por 10.30 baje mynstep la ïoh ka jingrwai pynrhem mynsiem na ka Jingïaseng Samla Balang Khimusniang bad ïa ka khubor na ka ktien U Blei la sam da u Rev. S.D. Lanong.
Ha kane ka sngi, u Rev. Lanong u la sot na ka shithi 1 u Petros, 2:9, kaba u la buh ïa ka phang pdeng ka dor jong ka jinglong Khristan ha kine ki sngi kiba mynta.
U la ong ki Khristan ki dei kiba la khot da u Blei na ka jingdum sha ka jingshai bad bun ki Khristan ki long kumba long ka sopti haba sngew donkam ïa ka, ki phong bad ha bym sngew donkam ki law na ka met.
U la pynkynmaw ïa ki Myntri jong ka Hima Sohra kiba la kyrpad ïa u Syiem Borsing ban ieh noh shipor ïa ka jinglong Khristan khnang ban thung Syiem biang ïa u ha kata ka khet kaba u don bad u Borsing Syiem u la ong ba U Jisu um dei ka sopti kaba lah ban law katba mon bad wei ba la phong la phong shi junom.
Katba ha ka jingïaseng ba-ar, ïa ka khubor na ka ktien U Blei la sam da u Rev. E.K. Mujat kaba u la pynshong nongrim na ka kitab 1 u Samuel – 30:8.
Hadien ka jingkren ïa ka khubor jong U Blei la ïoh ïa ka jingrwai ‘Choir’ na ka Jingïaseng Samla Balang Latawor, Jingïaseng samla Balang Sohkha, Jingïaseng Samla Balang Samatan bad Jingïaseng Samla Balang Lad Basic, Jingïaseng Samla Balang Kairang, Jingïaseng Samla Balang Maskhal, Jingïaseng Samla Balang Moodymmai Neiñ bad Standing Choir Jingïaseng Samla KJP Synod Mihngi.
