Shillong, Lber 05:
Ar sngi shwa ba u Conrad K Sangma un leit ban bam smai kum u Myntri Rangbah ka jylla ha ka sorkar kaba thymmai kaba la pynbeit ban long ha ka 7 tarik mynta u bnai ha ïing sah u Lat ka jylla, ka UDP bad ka PDF mynta ka Sngi U Blei ki la leit ban ai jingkyrshan ïa ka sorkar ba la lamkhmat da ka NPP bad BJP.
Kane ka jingleit ai jingkyrshan ka UDP bad PDF ïa ka sorkar ka ban lamkhmat da ka NPP, BJP bad kiwei ka dei hadien ba ki la sngewthuh ba kim lah ban thaw ïa ka sorkar synrop jong ki seng riewlum hadien ba kim biang briew wat lada la ai jingkyrshan da ka seng VPP, TMC bad Congress.
Ka jingbam smai u Conrad Sangma kum u Myntri Rangbah ka jylla ryngkat ki Myntri ha ka sorkar MDA-2 la pynbeit ban long ha ka 7 tarik mynta u bnai ha iingsah u Lat ka jylla. Ha kane ka sngi yn ïadonlang u Myntri Rangbahduh ka ri India, u Narendra Modi, u Myntri kam poh ïing ka ri, u Amit Shah, u Myntri Rangbah ka jylla Assam, u Himanta Biswa Sharma bad kiwei.
Ka jingbym lah ban thaw ïa ka sorkar synrop da ki seng riewlum hapoh ka jingïalam ka UDP, PDF, VPP ba la kyrshan lang da ka Congress, TMC ka dei namar ka jingbym wan poi jong ar ngut ki MLA ka HSPDP kaba la pynbeit ha ka 3 tarik mynta u bnai ha ïing sah Myntri kam poh ïing barim ka jylla, u Bah Lahkmen Rymbui.
Hadien ka jingïalang thang tyngshop ba pynlong da ki sengbhalang ïa ar ngut ki MLA ka HSPDP ha ka 4 tarik mynta u bnai ha Motphran, u President ka HSPDP Bah K.P Pangniang u la kren sha ki lad pathai khubor ba lada ka UDP ka pyntikna ban pynbiang ïa ka jingdon ki briew ban thaw ïa ka sorkar, kine ar ngut MLA ka HSPDP ki kloi ban wan kyrshan. Hynrei ha ka Sngi U Blei ka 5 tarik Lber 2023, ka UDP bad PDF ki la leit rah syndon da ka jingthoh sha u Conrad K Sangma ban ai jingkyrshan ïa kane ka sorkar NPP bad BJP.
Da ka jingwan ai jingkyrshan ka UDP kaba don 11 ngut ki MLA bad ka PDF kaba don 2 ngut ki MLA, ka jingdon briew ha ka sorkar MDA-2 ka la kot 45 ngut namar ka NPP ka la don 26 ngut, BJP 2 ngut, MLA shimet 2 ngut bad HSPDP 2 ngut.
Katba ki seng saiñ pyrthei kiba shong ha ka liang pyrshah ki long ka TMC, Congress bad VPP kiba don 14 ngut ki MLA.
