Shillong, Lber 05:
Ka North Eastern Indira Gandhi Regional Institute of Health and Medical Sciences (NEIGRIHMS) ka la rakhe ïa ka ‘13th Annual Day’ ha ka 4 tarik mynta u bnai ha NEIGRIHMS.
Ka jingrakhe ka la sdang da ka jingrwai pdiang sngewbha na ki samla pule.
Ha katei ka jingrakhe, la ïadonlang u Prof. (Dr.) Balram Bhargava, Chief, Cardio-Thoracic Sciences Centre & Head, Department of Cardiology, AIIMS, New Delhi, uba long ruh u kongsan.
Haba ai jingkren, u la ban jur halor ka jingdonkam jong ki 3 tylli ki S – Samvedana (Empathy), Samvad (Communication) bad Sparsh (Clinical Touch), ha ka por ba sumar ïa baroh ki nongpang sha kito ki samla kiba dang shu pyndep ïa ka MBBS, MD/MS Post Graduate Residents & MSc. Nursing.
Na ka liang jong u, u la pynsngew ruh ïa ka ‘13th NEIGRIHMS Annual Day Oration’.
U Prof. (Dr) Nalin Mehta, Director NEIGRIHMS, u la kdew ïa ka jingdonkam jong ki nongrim ha ka liang ka jingsumar bad ka jingburom na bynta ki nongpang. U la kyntu ruh ïa ki samla pule ban long kiba kloi ban ai ka jingsumar ïa ki nongpang.
U Prof. Animesh Mishra, Registrar, NEIGRIHMS, u la ai ïa ka jingkren pdiang sngewbha, katba u Prof G.K. Medhi, Dean, NEIGRIHMS, u la kren shaphang ki kam bapher-bapher haba ïadei bad ka pule-puthi ha NEIGRIHMS.
Ha kane ka jingrakhe, u Prof. (Dr.) Balram Bhargava, Kongsan, u la aiti ruh ïa ki syrnot sha ki samla pule MBBS (2017 batch), MD/MS Post Graduate Resident, bad M.Sc. Nursing, ha ryngkat ka khusnam ‘Best Outgoing Graduate’ kaba la ai sha ka Dr. Debabrita Chakraborty.
Nalor kane, la ai ruh ïa ka khusnam ‘Best Scientific Publication Award’ sha u Prof. T. Natung, HoD, Ophthalmology, Dr. Pranjal Phukan, Addl. Prof., Radiodiagnosis ha ka ‘Faculty Category’ & sha Dr. Kalaragini Rajshekhar ha ka ‘Resident Doctors Category’.
Kiwei-kiwei ki khusnam ba la ai ha katei ka sngi ki kynthup ïa ka ‘Best Oral Presentation’ bad ‘Best Poster Presentation’.
Ka jingrakhe ïa ka ‘13thAnnual Day’ ka la kut da ka prokram halor ka lariti kaba pyninam ïa ka kolshor bapher-bapher jong ka Thaiñ Shatei Lam Mihngi.
