Thane, Lber:
Ki pulit ki la ïoh ban kem ïa ki 18 ngut ki nong Bangladesh, kynthup 10 ngut ki kynthei, na Thane distrik kaba don ha Maharashtra hadien ba la lap ba ki la sah beaiñ ha kane ka ri, la ïathuh ki heh pulit ha ka sngi Saitjaiñ.
Ïa kitei ki briew la kem da ki pulit jong ka Navi Mumbai ha ka por shiteng synñia jong ka 1 tarik, Lber bad ka 2 tarik, Lber, u la ong. “Ki pulit ki la ïoh jingtip ba ki la don kumba katto katne ngut ki nong Bangladesh ki ban sa leit ïashim bynta ha ka jingkhawai jong ka jingdap lyngkhuh snem jong ka jingïathoh shong kurim jong uwei napdeng jong ki ha kawei ka ïing kaba don ha ka thaiñ Ghansolio kaba don ha Navi Mumbai. Kum shi bynta ban leh ei ei halor kane, ki heh jong ka kynhun Crime branch jong ki pulit ka Navi Numbai ki la pynlong ïa ka jingleit khynra ha ki ïing ha katei ka thaiñ ha katei ka miet,” la ïathuh u heh pulit jong ka jaka treikam kaba don ha Rabale.
Ki la don kumba 10 ngut ki kynthei bad 8 ngut ki shynrang kiba la shahkem ha ka por ba don katei ka jingpyntreikam naba la lap ïa ki ba ki la sah ha katei ka jaka naduh kumba shi snem ba la leit wat lada ki kot ki sla kim treikam shuh ha ka ban ai jingbit ba kin sah ha kane ka ri, u la bynrap.
Kine kiba la shah kynnoh ki la shah pynngat ha ka Foreigners Act, 1946 bad kumjuh ruh ha ka Passport (Entry into India) Rules, 1950 bad ka jingtohkit ha kaba ïadei bad ka jingjia ka dang ïai bteng, la ong ki pulit.
