Kolkata, Lber:
U nongaiktien jong ka seng Congress ha West Bengal u Kaustav Bagchi ha ka sngi Saitjaiñ u la shahkem na ka ïingsah jong u halor ka jingshah kynnoh ba u la kynthoh pyrshah ïa ka Myntri Rangbah jong ka jylla ka Mamata Banerjee, la ïathuh ki heh pulit.
Ka la don ka kynhun kaba bun jong ki pulit ka Burtolla kiba la pynlong ïa ka jingleit khynra ha ka ïingsah jong u Bagchi kaba don ha Barrackpore ha North 24 Parganas distrik ha West Bengal ha ka por 3.30 mynstep bad kem noh ïa u, u la ong. Ka la don ka jingmudui kaba long pyrshah ïa u Bagchi ha ka jaka treikam jong ki pulit ka Burtolla ha ka sngi Thohdieng halor ka jingshah kynnoh ba u la kren pyrshah ïa ka Myntri Rangbah.
“Ngi la kem noh ïa u Kaustav Bagchi na ka ïingsah jong u kaba don ha Barrackpore. Ngim lah ban batai ei ei shuh nalor nangne ha kaba ïadei bad ka jingjia. Ki heh pulit jong ngi ki la ïakren bad u,” la ong u heh pulit ha ka jingïakren bad ki nongthoh khubor.
U Bagchi, uba long u nongïasaid aiñ u la kynthoh jur pyrshah ïa ka Myntri Rangbah bad ïa ka heh nongïalam jong ka seng Trinamool Congress ka Mamata Banerjee halor ka jingthombor jong ka da ka bor ïa u President jong ka West Bengal Pradesh Congress Committee u Adhir Ranjan Chowdhury hadien ba la jop ka seng Congress ha ka ilekshon shiteng samoi ha Sagardighi.
Hadien ka jingshahkem, u Bagchi u la shah ïalam sha ka jaka treikam jong ki pulit ka Burtolla wat lada ki nongbud jong ka seng ki la pynlong ïa ka jingïakhih kaba jur habar ka jaka treikam jong ki pulit.
U Bagchi u la shah pynngat ha kiba bun ki kyndon jong ka IPC kynthup hapoh ka 120(B), 504, 506 bad halor kiba bun kiwei pat ki kyndon, u la bynrap.
