Mumbai, Lber:
Ïa ki Licence jong ki 6 ngut ki nongpynmih dawai jyrhoh ha Maharashtra la pynduh noh namar ka jingpynkheiñ jong ki ïa ki kyndon, la ong ka sorkar jylla ha Legislative Assembly.
U Myntri jong ka Food and Drugs Administration u Sanjay Rathod u la ai ïa kane ka jingpyntip ha Assembly ha ka sngi Thohdieng katba u dang ai jubab halor ka jingbuh jingthoh jong u MLA jong ka seng Bharatiya Janata Party (BJP) u Ashish Shelar bad kiwei pat.
Ka dawai jyrhoh ba la shna da ka kompeni kaba don ha Noida ha Uttar Pradesh ka la shah pynshisha ba ka la long ka daw jong ka jingïap jong ki 18 ngut ki khynnah ha Uzbekistan ha u snem ba la lah.
Ki pulit jong ka Noida ha ka sngi Thohdieng ki la ong ba ki la kem ïa ki lai ngut ki nongtrei jong ka kompeni.
U Rathod u la ong ba ka sorkar Maharashtra ka la pynlong ïa ka jingtohkit pyrshah ïa ki 84 ngut na ki 108 ngut ki nongpynmih dawai jyrhoh ha ka jylla.
Saw ngut napdeng jong ki ki la shah hukum ba ki dei ban sangeh noh shi syndon ha ka ban pynmih dawai katba ïa ki Licence jong ki 6 tylli ki kompeni la pynduh noh, u la ong.
Ki la don kumba 17 tylli ki kompeni shna dawai kiba la ïoh shithi maham ha kaba ïadei bad ki jingpynkheiñ kyndon jong ki, la bynrap u Myntri.
U Shelar u la ong ba ka jingïap jong ki 66 ngut ki khynnah ha Gambia kumba la pynshisha la ong ba ka la dei na ka daw jong ka jingdih ïa ki dawai jyrhoh ba la shna ha India.
Hynrei u Myntri u la ong ba ka kompeni kaba la shah mudui halor ka jingpynkheiñ kyndon, ha katei ka jingjia, ka dei kaba ha Haryana bad ba kam shym don kano kano ka jaka shna ne pynmih dawa kaba ha Maharashtra.
“Ha kaba ïadei bad kane, ngi la shim da ka lynti kaba pyrkhing pyrshah ïa ki nongpynkheiñ kyndon. Ngi la pyntikna ba ïa ki World Health Organization’s GMP (good manufacturing practices) Certification-related Rules bad Certificate of Pharmaceutical Products la dei ban bud da kine ki jaka pynmih bad shalan dawai na ka jylla,” u la bynrap.
U heh ba dei khmih halor kane, u Sanjay Shirsat u la ong ba lada don kumba 20 per cent ki jaka pynmih dawai ki ban shah khynra kamut ba ka la don lypa ka jingpynkheiñ ïa ki kyndon, ka la donkam namar kane ban shim khia khnang ba kan ym long ka jinglehkai ïa ka jingim bakordor jong ki briew.
U Rathod u la ong ba ki la don kumba 996 tylli ki jaka pynmih dawai Allopathic ha ka jylla, 514 tylli ki dei kiba la shalan ïa ki dawai shabar ri.
