Raphael Warjri
Ka shai kdar ba ka sur paidbah ka la dep rai ban kyntait ia ki seng ki ba la khohñioh namar ba pangnud ia ka jingiap u bah Cheristerfied khongwir, namar ba syntan ban weng ia ki jingeh ka Themmetor ha Ïewmawlong, namar ba torti ha ka kam pynbeit u pud u sam bad kiwei kiwei ki kam bamsap bad iuhroit ia ki paidbah, hynrei ka sorkar donkam ban thaw wat la dei ban lape ia ki jingiapher hapdeng ki para seng saiñpyrthei riewlum. Toi, ki don ki ba khohñioh ia ka AITC ruh tangba donkam pat ki khlieh kyrtong ba jop ban biang ka kynhun. Horkit hordang ka seng VPP ka la kyndiah lypa ia ka banse ka thom ia ka sang ban kyrsum ha ka lyngwiar bamsap, hynrei donkam tyngeh u khliehduh Khasi ha ka synshar khadar. Ka sur paidbah ka pyrta ia baroh ki kyrtong nongjop na ki seng saiñpyrthei na ka thaiñ ban jubab shai kdar katkum kata ka sur ba pyrta jam.
Ka bate khlieh kyrtong ba jop ia ka jied-lamkhmat sha dorbar thawaiñ jylla lait noh ka BJP (2) bad NPP (26) ka long: UDP (11) + INC (5) + AITC (5) + VPP (4) + HSPDP (2) + PDF (2) + IND (2) = 31 la biang ban thaw sorkar lada kiar na ka BJP, ban kyntait ia u lakam NEDA ban ieng rasong ka daw jong ka jaitbynriew; lym kumta u Dr Himan Biswa Sarma, Myntri Rangbah ka jylla Assam un leh khraw ban tuklar ia ka kam iing jong ka jylla Meghalaya. Ka sur angnud ki paidbah ka long ban shngaiñ ki riewlum bad balang Khristan, kham suk ban tynruh ia ka jingdawa ILP, ka ktien Khasi ban rung ha ka Khyrnit- 8 jong ka Riti Synshar ka Ri India, ban tuklar ia ka huri hura na ka rukom pynbeit ia u pud u sam, ban kyntait mardor ia ki kyndon aiñ sorkar kmie ha ka liang ka NRC, CAA, UCC bad kumta ter ter.
Katba dang pynkhreh ha la ka jong ka jylli ba ka NPP bad BJP kin thaw sorkar bad ki la leit kam hakhmat u Lat ka jylla, Shri Phagu Chauhan; markylliang ka UDP, INC, TMC, HSPDP, PDF bad arngut ki kyrtong shimet ki la pynkhreh kumjuh da ka ba ia kynduh lang ha iing jong u Bah Lakmen Rymbui. Kyndit kynsan ha ka nohphai sngi la jah rngai ki arngut ki nongmihkhmat na ka seng HSPDP, khlem ka jingtip jong ka seng ban leit ai juban na ka bynta ban kyrshan ia ka kynhun jong ka NPP. Kane ka la pynbitar ia baroh bad la sdang ban kthong ia kita ki arngut, khnang ban tip ia ka daw ba ki la shetkylla ha ka khyllipmat bakhatduh. Lada kane ka iaineh, ka paw shai ba ka NPP bad BJP kin long ki khlieh seng ban synshar ha jylla bad ym don kano kano ka snap ban ioh da u myntri rangbah Khasi. Ki khun Sing laitlan ki la hap ha krem liewlep bad la dum hi tliw haduh ban da pah da ki Syntiew ne tied da ka Bom bad tbeh da u Mombati ruh ki Kti kim lah tba shuh ba la jah jlang khlem lapdien trai, u Prah u la jynjar ban peh stait.
Shwa ka tamasa jied-lamkhmat ka seng HITO ka la mih shaphrang ban kyrshan tyngeh ia ka VPP bad mynta ynda la kylla lieng ka sawangka thaw sorkar la mih pyrthei sa ka Sur U Paidbah ba la ialam da u Bah Erwin Syiem Sutnga bad ka seng HYC ban khihwin hadien ba ka Method thaw sorkar ka la hiar Shatbian. Nalor ba ki kyrtong kim lah ban khajoh ki khlieh kyrtong kat ka seng NPP, katta ruh yn dang pyrta shla ban thaw rynsan synshar da ka ba synjor. Tharai dang ia kynmaw ba ka seng PDIC u Bah G G Swell, nangta ka seng MDP u Bah A H Scott, nangta ka seng PDM u Bah Sounder Strong Cajee, nangta ka seng KHNAM u Bah Paul Lyngdoh kaba la jreiñ sha kiwei pat ki nongialam, baroh ki la kie baketha ha ki dienjat bym lap dien shuh; bad mynta sa ka kynhun KAM ruh ha kajuh ka apot. Lehse ka la dei ia ka VPP ban pyrto kyntiew nam ba ym dei tang ba la skhem ha la ka nongrim, hynrei la thoh shun ki blei ba kan rasong haduh katne katne. Ha kane ka kynti dang shylluit tang saw tylli ki khlur ka VPP namar la kham dier ban ioh ithuh da ka kliar-iktiar jied-lamkhmat (Election Commission) bad ban pynbna ia ka shab jong u Prah u ba la pyrshang peh stait tang hapoh khyndiat taiew. La kumno kumno ka long kaei kaei ka ba jynjar ban batai ba kumno u Bah Paul Lyngdoh, Bah Ardent Basaiawmoit bad Dr Mukul Sangma kum ki khla na ki lai rynsan ba iakhing pyrshah, kin lah ban ia mir lang ha kawei ka jylli. Kumba ka la paw ha ka saiñpyrthei ka ban dang iaid shaphrang, u Bah Adelbert Nongrum bad Bah Brightstarwell Marbañiang ha ryngkat bad u Bah Ardent kin sa kyrhuh jam ha iing dorbar thawaiñ lada don ha kano kano ka liang ruh. Napdeng ki kyrtong rangbah kiba la ih pura ha ka saiñpyrthei ka sur paidbah ka bynñiaw ba la shahrem noh ki radbah kum u Bah Himalaya M Shangpliang bad Bah George B. Lyngdoh ha kaba la khate noh ia ka kupar jongki, lehse na ka daw ba ki la leit ia snoh kti bad ka seng BJP bad TMC ka ba ki paidbah salonsar ki la khohñioh naduh ba sdang.
Ka sur paidbah kam da suitñiew than haba la rem noh ki jong u Bah Vincent H Pala, Bah Process T Sawkmie, Bah Mohendro Rapsang, Bah Hamletson Dohling na kano ma ka daw kaba baroh baroh ki sngew tngen. Na ki daw bah ba kongsan ka long ba la shitrhem shikatdei ka jingjop jong u Bah Brightstarwell Marbañiang, ka jingmih paw ka longkmie na Jaintia Hills, ka Kong Santa Mary Shylla, ka nam jop jong u Bah Paul Lyngdoh kum u nongialam baproh bad bashlur bad ka ba wanphai biang u Bah Ronnie B Lyngdoh. Lehse kaei ka ba ki ba bun ba lang kim khmih lynti ka long ba uwei na ki radbah ba la shakri tyngeh la bun bun snem ia ki paidbah nongkyndong ha la ka jylla, u Bah Ollan Sing Suiñ u ba long u kyrtong ba la mon tyngeh ki paidbah ka thaiñ Mawsynram haduh ba u la kit ia ka nampop ba don burom katkum ka nong ba u la thehsei ha ka imlang sahlang.
