New Delhi, Lber:
U Myntri Sorkar Pdeng u ba dei khmih ïa ka Tnat Pynïaid Aiñ, u Kiren Rijiju ha ki khyndiat sngi kiba la leit noh u la ong ba ka imlang sahlang ne ka ri kin nym lah ban rakhe sngewbha ïa uno uno u mawjam lada ki ‘riew kynthei bad ki khynnah rit kim shym la ïoh mad ïa ka shong suk shong saiñ.
U la pyntip ba ka kam shah leh be-i-jot bad shah thombor jong ki khynnah rit ka dei kawei na ki kam kaba sang tam ba ka imlang sahlang ka la ïakynduh ïa ki jingeh kumno ban tehlakam. Ïa kitei ki kyntien, u Myntri u la pynsngew ha ka rynsan (national conference) kaba la pynlong halor ka matpdeng ‘Child Sexual Abuse Material”.
Ïa katei ka rynsan la pynlong da ka National Human Rights Commission (NHRC) ha Vigyan Bhawan, New Delhi. Haba ai jingkren ha katei ka jingïalang, na ka liang u Myntri u la ong ba ïa katei ka rynsan la lah ban pynlong ha ka por kaba donkam kyrkieh; bad u la pynsgew ba na ka liang ka jong u, u don ïa ka jingkyrmen kaba khraw ba katei ka rynsan kan lah ban pharia ïa ka khubor kaba bha tam na ka bynta ban wanrah ïa ki lad ki lynti kiba janai na ka bynta ban tahlakam bad rat dyngkhong ïa ki kam bymman kiba la pynhiar kyrdan arsut ïa ka imlang sahlang bad kumjuh ruh ïa ka ri hi baroh kawei.
Ha ka jingai jingkren jong u, u la kyntu ruh ba ka imlang sahlang ka dei ban ïatylli kawei na ka bynta ban wanrah ïa ka shong suk shong saiñ jong ki riew kynthei bad kumjuh ruh ki khynnah rit kiba dei ka lawei jong ka imlang sahlang bad ka ri.
Na ka liang ka jong u Myntri, u la ban khia ruh halor ki mat kiba ïadei bad ki jingeh bad jingshah thombor bad u ka kyntu ïa ki lad treikam bad kumjuh ruh ïa ka imlang sahlang ba kan ïatrei lang kawei na ka bynta ban rat dyngkhong ïa ki kam beaiñ pyrshah ïa ki khynnah rit.
Kat kum ki jingïoh lum khubor la ïathuh ba na ka liang u Myntri u la leit ban plie paidbah ïa katei ka rynsan ha ka sngi Palei ba la dep ha ryngkat ka jingïadon lang jong u Chairperson jong ka NHRC – Arun Kumar Mishra, ki ophisar rangbah jong ki tnat sorkar bapher bapher, ki ‘riew shemphang, bad kiwei kiwei ki kynrem ki lyndan.
