Shillong, Lber 05:
U State President ka BJP, Bah Ernest Mawrie ha ka Sngi U Blei u la ong ba ka jingïasam shuki Myntri na bynta ka BJP ha kane ka Sorkar bathymmai kan long tang kawei hadien ka jingwan ai jingkyrshan jong ka UDP bad PDF ïa ka kynhun ïatehlok hapoh ka jingïalam ka NPP.
“Ka BJP ka la shim ïa ka rai ban ïa bujli shuki Myntri khnang ba baroh 2 ngut ki MLA ki lah ban ïadonlang ha ka Kynhun Myntri,” la ong u Bah Mawrie.
Kum ban shu kdew hangne, ka National People’s Party (NPP) ha ka Sngi U Blei ka la ïoh jingkyrshan sa na ka United Democratic Party (UDP) bad ka People’s Democratic Front (PDF) na bynta ban thaw ïa ka Sorkar bathymmai hapoh ka jingïalam jong katei ka seng.
Da kane ka jinglong-jingman bathymmai ha ka saiñ pyrthei hapoh ka Jylla, ka jingkhlaiñ jong ka Sorkar ban wan hapoh ka jingïalam ka NPP ka la kiew sha ka 45 ngut.
Ka kynhun jong baroh 2 tylli ki seng ba kynthup ïa ki nongmihkhmat ka la aiti ïa ki shithi jingkyrshan sha u Conrad Sangma ha ïingsah jong u.
Ka NPP ka la long ka seng kaba bun paid eh hadien ba ka la jop na 26 tylli ki konstiwensi ha kane ka ilekshon ba la dep.
Ka UDP kaba la wan ba-ar ha ka jingbun paid ka la jop 11 tylli katba ka PDF ka la ïoh 2 tylli.
Kine ki 2 seng ki la nang pynkhlaiñ shuh-shuh ïa ka kynhun ïatehlok hapoh ka jingïalam ka NPP kaba la don lypa 32 ngut ka jingbun paid ha ryngkat ka jingkyrshan jong 2 ngut ki MLA ka BJP, 2 ngut na ka HSPDP bad 2 ngut ki MLA shimet.
U Sangma ha ka rynsan lad pathai u la ong, “Khublei sha phi ka UDP bad PDF kiba la wan shakhmat ban pynïasoh bad ka NPP ban thaw ïa ka Sorkar. Ka jingkyrshan na ki seng saiñ pyrthei kiba na ka Jylla kan nang pynkhlaiñ shuh-shuh ïa ngi ban shakri ïa ka Meghalaya bad ki nongshong shnong jong ka.”
