Man ka por ki paidbah ki la ju kylla ’langkñia ha ki nongpynshit kiba pynkhih shnong pynkhih thaw halor kiba bun ki mat. Mynta ka sien, ki paidbah ki la shah pynshongshit halor ka mat kaba ïadei bad ka jingthaw Sorkar haduh ba ki 2 ngut ki MLA ka Hill State People’s Democratic Party (HSPDP) ki la shah kynnoh shah kynthoh bad shah byrngem, bad shah ñiew kum ki nongshet kylla. Ha ka jingshongshit bad jingkhluit, khlem tip ïa ka sdang ka kut, la shah pynjulor sa ki jingdon jingem khamtam jong u MLA ka Mawshynrut, u Bah Methodious Dkhar tang hadien ba la pynbna ban ai jingkyrshan ïa ka National People’s Party (NPP) ban thaw ïa ka Sorkar kaba thymmai. Kine ki MLA ki la syier ka jingim namar ka jingshongshit bad khiebhur ki paidbah ban pynrem haduh ba la don sa ki seng kiba ïalam ban thang ïa ki tyngshop jong ki 2 ngut ki MLA ka HSPDP na Mawshynrut bad Mawthadraishan.
Ki paidbah kiba la mih da ka jingsngewkhia namar ki kwah ban ïohi ïa ka Sorkar kaba thaw da ki seng riewlum, ki la shah ïalam bakla namar kata ka jingkwah ban thaw Sorkar da ki seng riewlum kam shym la poi shano-shano. Bapli ki paidbah kim sngewthuh bha ïa kane, hynrei ki shu ngeit namar ki sngewkhia naduh ka mynsiem. Ka jingshisha ka long, kumno kita ki seng riewlum kiba don tang khyndiat ngut ki MLA kin lah ban thaw Sorkar namar kano-kano ka seng saiñ pyrthei lane ka kynhun jong ki seng saiñ pyrthei ka donkam ban ïoh ïa ka jingbun paid na ka bynta ban thaw ïa ka Sorkar. Katba ka jingpynrem ka dang jur bha ïa kitei ki 2 ngut ki MLA ka HSPDP, kiwei pat ki seng saiñ pyrthei kum ka United Democratic Party (UDP) bad ka People’s Democratic Front (PDF) ki la leit ban ai jingkyrshan lang ïa ka NPP.
Haba kumne, tang ïano yn kynnoh, ka dei hok mo ban pynrem tang kitei ki MLA ka HSPDP bad ñiew ïa ki kum kita ki nongshet kylla ka Jaitbynriew. Lada ki seng riewlum ki thaw ïa ka Sorkar ruh, kim lah ban thaw tang para maki, hynrei ki donkam ïa kiwei pat ki seng saiñ pyrthei ban synrop lang. Namarkata, wat laplap ban pynrem ïano-ïano, wat shongshit bad wat mlien ban pynshit kulmar ïa ki paidbah namar ka long kaba mynsaw. Donkam ban ïaishah bad wad ïa ki jingshisha, namar ka long ka jingbabe hadien bad lehraiñ hakhmat ka pyrthei. Hato kitei 2 ngut ki MLA ka HSPDP ki dei ki nongshet kylla ne ka don kaei-re- kaei na lyndet ba la aibuit ban pynkulmar ïa ka jingthaw Sorkar. Kitei 2 ngut ki MLA ka HSPDP ki la pynshai lyngba u President ka seng jong ki, ba ki kloi ban wanphai sha kata ka kynhun ki seng riewlum ban thaw ïa ka Sorkar lada ki la dep lut ban pynbit pynbiang.
Mynta ka la paw shai ba kiwei ki seng saiñ pyrthei ruh ki kwah ban donlang bad ka Sorkar kaba ïalam da ka NPP ym tang ka HSPDP marwei. Kita ki seng kiba pynkhih win ïa ka jingthaw Sorkar, ki la byrngem ruh ban leit tur sha ïingsah u Lat ban khanglad ïa ki MLA ka HSPDP ban leit synrop bad ka NPP. Mynta ka jingkylli ka long, kin leh kumno pat ïa ki MLA jong kiwei pat ki seng kiba la rai ban kyrshan lang ban thaw ïa ka Sorkar kaba thymmai. Hato kin panmap na kitei ki MLA ka HSPDP namar la shah kynnoh nongshet kylla bad la thang ïa ki tyngshop jong ki? Ym lah ban shu kynnoh nongshet kylla kulmar bad leh shongshit tang ban pynkhluit ïa ki paidbah. Ban thaw ïa ka Sorkar, ka dei ka kam jong ki seng saiñ pyrthei kiba ïoh ïa ki MLA kiba shahjied ha ka ilekshon. Ban tuklar ïa ka jingthaw Sorkar da kiwei pat ki kynhun kiba don shabar na ka jylli saiñ pyrthei ka long kaei-kaei kaba ym ju kham jia koit.
Kumta ki MLA kiba shahjied ki don ka hok ban thaw ïa ka Sorkar. Ka Jylla ka donkam ïa ka Sorkar kaba skhem bad kata ka Sorkar ka dei ban ai ka jingshakri kaba bha tam eh na ka bynta ki paidbah nongshong shnong.
