Jeddah, Lber:
Ha kane ka por la ong ba ka Saudi Arabia ka la pynbna ba kan sa pynrung noh ia ka jingkilan met ‘Yoga’ ha man ki jaka pule jongka ri khnang ban iarap tei ia ka bor pyrkhat bad kumjuh ia ka met jong ki khynnah pule.
Haba iadei bad kane, la ong ba kan sa don ka jing-iapynbeit lem da ki tnat bapher bapher bad ki jaka pule ban ai jingkyrshan halor katei ka mat ban wanrah ia ka jingkilan met ‘Yoga’ hapoh ki jaka pule ha kine ki khyndiat por ban wan.
Hapdeng ka jingiashim bynta lang hapoh ka ‘Fourth Session’ kaba la pynlong ha ka Sngi Thohdieng, halor ka phang ‘Development & Promotion of New Sports Games in Universities’, ka Al-Marwaai ka la iathuh ba katei ka committee ka dang ialeh katba lah ban wanrah noh ia katei ka rukom kilan met hapoh ki jaka pule, khnang ban wanrah ia ki jingmyntoi kiba kongsan kum ki khynnah samla mynta ki donkam naduh ka jingpynkhlaiñ ia ka bor pyrkhat bad kumjuh ban pynkhlaiñ ia la ka met . Namar la ong ba katei ka jait jingkilan met, ym tang ba ka iarap ban pynkhlaiñ ne pynwan dur ne ban pynneh ia ka met u briew, hynrei ka iarap ruh shibun ia ka bor pyrkhat ka jong u briew.
Shuh shuh ruh ka la ong ba ka Yoga kam long tang katta, hynrei ka long ruh kaba ai jingmyntoi haba iadei bad ki rukom pynwan dur, ban ring mynsiem, ban pyndonkam ia ki dohksah bad hadien kata kan sa wan ka ‘Dhayan’ bad ‘Yoga Nidra’ kaba ki ju iohi barabor.
Kumta ruh ka la ong ba katei ka committee ka pyrshang ban wanrah ia kaba bha tam naka bynta ki khynnah samla ha kane ka juk ba mynta, khnang ba kan iarap ia ki ba kin ioh ban leit ban iakhun shabar bad ba kin nang kyntiew ia ka sap- ka phong kaba ki don ha ryngkat bad katei ka rukom kilan met ka ban aibor bad pynkhlaiñ shuh shuh ia ki nalor jong ki jait jinglehkai bad ki sap- ki phong ba ki la don lypa.
Ia kane la pynbna hapoh Riyadh, ha ka jingiakren kaba hap hapoh jong ka phang ‘The Role of University Sports in Supporting the Kingdom’s Vision in Sports’, ba la pynlong kyrpang da ka Saudi Universities Sports Federation ha ryngkat ka jingiatrei lang lane ka jingiasnoh kti lang jong ka tnat pule puthi jong ka ri.
