Shillong, Lber 05:
Ka Hynñiewtrep Youths’ Council (HYC) kan sa shong jingïalang kyrkieh ïa ka Central Executive Committee (CEC) ban ïakren halor ka jingleit ai jingkyrshan ka UDP bad PDF ïa ka NPP bad BJP ban thaw ïa ka sorkar kaba thymmai.
Haba ïakren bad u Bah Robertjune Kharjahrin uba dei President, u la ong ba ka seng kan sa shong kyrkieh ïa ka CEC lashai ka sngi ha shlem treikam ha Shillong ban ïakren halor ka jingleit kyrshan ka UDP bad PDF ïa ka NPP bad BJP.
Kum ban shu pynkynmaw, ka HYC ka la thang tyngshop jong ar ngut ki MLA ka HSPDP; kawei ha ka dur u Bah Shakliar Warjri uba mihkhmat na Mawthadraishan bad u Bah Methodius Dkhar na Mawshynrut namar ka jingleit ai jingkyrshan ïa ka NPP bad BJP kaba la long ha ka 4 tarik mynta u bnai ha Motphran.
Haba ka jingdawa ka dang ïaid haduh ka step Sngi U Blei ban wanlam biang ïa kine 2 ngut ki MLA HSPDP ban wan kyrshan ïa ka UDP ban long Myntri Rangbah ka jylla da u Bah Metbah Lyngdoh, hynrei ha ka por janmiet jong ka Sngi U Blei pat kine ki ar tylli ki seng riewlum ki la leit ban ai jingkyrshan ïa ka seng NPP bad BJP.
Kum ban shu pynkynmaw, ka UDP ka dei ka seng ban lamkhmat ïa ka sorkar ki seng riewlum ba kyrshan lang da ka VPP, PDF, TMC, Congress bad HSPDP, hynrei namar bym sngewtikna ïa ka jingdon briew ka la leit ai jingkyrshan noh ïa ka NPP bad BJP.
