Shillong, Lber 06:
Hadien ba la mih bun ki jingkynthoh, u President ka United Democratic Party (UDP) u Bah Metbah Lyngdoh u la pynshai ba ka jingleit kyrshan noh ïa ka Sorkar ban lamkhmat da ka NPP ka dei hadien ba ka jingkwah ban thaw ïa ka Sorkar khlem ka NPP bad BJP kam shym la urlong satia namar ka jingphet noh jong 3 ngut ki MLA.
Haba kren sha ki lad pathai khubor ha ka sngi Nyngkong, u Bah Metbah u la ong ba ka jingpyrshang ban thaw ïa kawei pat ka sorkar ban lamkhmat da ka seng riewlum khlem kynthup ïa ka NPP bad BJP kam shym la urlong satia namar 3 ngut na ki MLA ba kynthup ïa arngut ki MLA ka HSPDP bad uwei u MLA shimet ki la rai ban leit kyrshan noh ïa ka Sorkar ba ïalam da ka NPP.
“Ha katei ka sngi hadien ba ngi ïohi ïa ka rai u paidbah, ngi sngew ïa ka jingmih ka sur kaba mih ba ka UDP ka dei ban ïalam ha ka ban thaw ïa ka Sorkar bathymmai. Ha kane kajuh ka sngi, ngi la don ruh haduh 30 ngut ki MLA, kaba mut ba ngi lah ban leit kam ïa ka jingbun paid hakhmat jong u Lat ka jylla. Hynrei ha ka por janmiet, ngi la ïoh jingtip ba 3 ngut napdeng jong ngi, ki la jah rngai ban leit kyrshan noh ïa ka NPP bad kane ka la pynhiar sha ka 27 ngut. Namar kata, kumno ngin leit kam da tang 27 ngut katba kawei pat ka liang ka la don 32 ngut,” la ong u Bah Metbah.
Shuh shuh na ka liang jong u Bah Metbah u la pyntip ruh ba ka kynhun ka la ap jan arsngi hadien ba u President jong kawei ka seng u la kular ban wanrah biang ïa ki MLA, hynrei kane kam shym la seisoh satia.
“Ngi la ïoh khubor na kawei ka liang jong ka kynhun ba ki kwah ïa ngi ban ïadonlang ha ka Sorkar. Namar ngi shem ba ngim don ïa u nombor, kumta ngi la rai ban leit ban ai ka jingkyrshan ïa ka sorkar ban lamkhmat da ka NPP,” u la ong.
Kawei ruh ka rai ba la shim halor kane ka jingleit ai jingkyrshan ka long ban pyntikna ban ïoh ïa ka sorkar kaba skhem.
Ha kawei pat ka liang u Bah Metbah u la ong ba ka ong kaba bakla na ka liang u President ka Voice of the People’s Party (VPP) Bah Ardent M Basaïawmoit ban kynnoh ba ka UDP ka la leh ïa ka drama politik.
“Ngam wan hangne kum u President ka UDP ban leh drama. Ngam pat ju leh ïa kino-kino ki drama ban pynbieit ïa ki paidbah bad ngan ym leh ruh ïa kata hadien habud ruh kumjuh. Kane nga kren shai na ka liang ka jong nga,” u la ong.
