Shillong, Lber 06:
U President ka Hynñiewtrep Youths’ Council (HYC) Sengkmie u Bah Robertjune Kharjahrin u la ong ba ka jingduh ban long Myntri Rangbah ka jylla da u briew uba dei na ka jaidbynriew Khasi bad Jaiñtia ka dei ka jingleh jong ki arngut ki MLA ka Hill State People’s Democratic Party (HSPDP); kita u Bah Methodious Dkhar bad u Bah Shakliar Warjri.
Haba kren sha ki lad pathai khubor ha ka sngi Nyngkong hadien ba ka seng ka la dep ban shong ïa ka jingïalang, u Bah Robertjune u la ong ba lada kitei ki ar ngut ki MLA ki ïaineh bad ki seng riewlum, ka jingdawa ban ïoh Myntri Rangbah da u Khasi katta ka la urlong, Hynrei, namar ka jingleh jong ki, da kaba phet noh bad leit ai jingkyrshan ïa ka National People’s Party (NPP) ban thaw ïa ka sorkar ïasynroplang ka la pynlong ïa kiwei ruh ki seng ba kin phet lang.
“Ka la donkam ïa kine ki seng riewlum ba kin ïalam ïa ka sorkar, kam dei eh ban ong ba kin ïa thaw ïa ka sorkar para maki namar kumba phi tip kim don ïa u nombar ban thaw sorkar para maki, hynrei ka shu donkam ba kin ïalam,” la ong u Bah Robertjune.
U Bah Robertjune u la ong ba ka jingdawa ban long Myntri Rangbah da u khun Hynñiewtrep Hynñiewskum kam dei satia ka jingbishni ïa ki paralok Garo, hynrei ka dei namar ba ki Garo ki la ïoh shibun ka lad ban ïalam ïa ka sorkar bad kane ka jingïohlad jong ki ban ïalam ïa ka sorkar na ka por sha ka por ka la pynlong ba shibun bah ka roi ka par ka la kham noh sha ri Lum Garo.
“Namar ba ki la leh ïa kiei kiei kiba bha lehse, ngi lah ban ong ba ka jingïoh bun jong ka NPP haduh 18 tylli ki shuki ha Ri Lum Garo ka long ba kaba bha bun ka roi ka par ka la leit lut shatei,” la ong u Bah Robert.
U la ong ba ka jingthrang bad ka jingkwah ban ïoh Myntri Rangbah da u Khasi ka dei namar ba lyngba uta u Myntri Rangbah lehse, yn sa lah ban pynbeit ïa shibun tylli ki mat la ka long ka bhah thungkam thungjam ne ka Reservation Policy, ka jingïapynbeit ïa u pud u sam, ka jingweng ïa ki Kharmetor na Ïewmawlong, ka jingdawa ban pynrung ïa ka ktien Khasi ha ka Khyrnit ba phra jong ka riti synshar ka Ri bad kiwei kiwei ki mat.
U la ong ba ka seng ka khlem pyrshah satia ban long Myntri Rangbah da u Bah Prestone Tynsong uba dei u Symbud Myntri Rangbah ka jylla barim, hynrei ka dei ka seng NPP hi kaba la dep rai lypa ba u Conrad K Sangma un long biang kum u Myntri Rangbah ka jylla.
