Imphal, Lber:
Ki bor sorkar jong ka jylla Manipur ha ka 5 tarik mynta u bnai ki la ïathuh ba haduh kumba 500 ngut ki ‘riew paidbah kiba bun napdeng jong ki ki dei ki khynnah rit bad ki ‘riew kynthei ki la kem bad la hap ban pynkynriah noh ïa ki sha hospital na ka daw jong ka jingsuba ngat bih na ka bam ba la sam ha kawei ka jingïalang kaba la pynlong ha ka shnong Chalwa Kuki, Kangpokpi district, Manipur.
Kat kum ki jingïoh lum jingtip na ki bor sorkar, ki la ïathuh ba ha ka sngi Saitjaiñ kaba la dep ki la don kumba 1,000 ngut ki nongshong shnong ka thaiñ kiba la leit ban ïashim bynta ha kawei ka tamasa kaba ïadei bad ka riti ka dustur ba la pynlong ha katei ka shnong ha ka por kumba 6:30 pm.
Katei ka shnong ka dei kaba don ïa kumba 1,700 ngut ki nongshong shnong. La ïathuh ba hadien katei ka tamasa, ha ka por kumba 9 baje mynmiet, bun na ki nongleit ïashim bynta ha katei ka tamasa ki la ïoh ïa ka jingpang prie pynhiar, ka jingsuh kpoh, ka jingpang shadeng bad kiwei kiwei ki jingpang.
Halor katei ka jingjia, la ïahtuh ba na ka liang ki Social Civil Organization jong katei ka shnong ki la leit ban pyntip sha ki bor shipai ka Assam Rifles, ba na ka liang ki bor shipai ki la phah ïa ki kynhun sumar ban pynbiang ïa ki lad jingsumar na ka bynta kitei ki nongshong shnong. Napdeng ki 500 ngut ki nongshnong kiba la kem pang, la ïathuh ba ki la don ruh haduh 70 ngut napdeng jong kim kiba la ïoh ïa ki jingshitom kiba kham jur.
Halor katei ka jingjia, la ïathuh shuh shuh ba na ka liang ki bor shipai ka Assam Rifles ki la leit ban thaw ruh ïa 2 tylli ki ‘medical camp’ ha katei ka shnong na ka bynta ban sumar ïa ki nongshong shnong.
Tad haduh ba la ïoh ïa kane ka kyrwoh, la ïathuh ba na ka liang ki bor sorkar ki la pynsdang ïa ki kam tohkit halor katei ka jingjia ngat bih jong ki nongshong shnong.
