Ha kine ki sngi, ngi la ïohi ïa ka kynrum-kynram ha ka jingthaw ïa ka sorkar bathymmai hadien ba ki paidbah ka jylla ki la dep ban ai ïa la ka rai. Ka jingbym ïoh palat 30 ngut ki MLA da kano-kano ka seng ha kane ka ilekshon, ka la pynsyrtok da kiba bun kynta ïa ka kam thaw sorkar hashwa ba kiei-kiei kin shai. Mar ïa dep pynbna ïa ka risol, ka BJP khlem da pynslem ka la leit bran-bran sha u Conrad K Sangma ban pynpaw ïa ka jingkyrshan jong ki arngut ki MLA jong ka. Hadien katto katne por, ki arngut ki MLA ka HSPDP na Mawthadraishan bad Mawshynrut ki la pynkhih win da kaba leit ai shithi jingkyrshan sha u Conrad, u nongïalam ka kynhun ki MLA ka NPP kaba la ïoh 26 ngut ki MLA. Nangta, wan mih sa ki MLA khlem seng, uwei na Rambrai-Jyrngam bad uwei na Baghmara, ban ai shithi ha u Conrad. Hadien kata, bud sa ki arngut ki MLA ka PDF bad 11 ngut ki MLA ka UDP. Sbak, la skhem ka sem u Conrad bad u la pynbna noh ba kan mih da ka sorkar bathymmai ba la suit la shor kum u Meghalaya Democratic Alliance (MDA) II lane 2.0 kumba dei ka rukom ïakren halor ki Mobile Phone bad ki kor ki bor kiba donkam ban shah pynkiew man la ka por.
Mynta ka la shai ba ka MDA II ka don 45 ngut ki MLA katba sha ka Liang Pyrshah, yn don 14 ngut ki MLA. Ka MDA II kan jop suk ha ka ilekshon ban jied ïa u Lamphang bad kumjuh ruh ha ka jingïatynjuh bor. Ym don shuh kano-kano ka wit ka wa ïa ka MDA II bad ïa u Conrad. Ki paidbah ki dei ban ïa hun noh namar ki la ïoh da ka sorkar kaba ki la jied. Balei ngi ong kumta namar ha ka MDA 1.0, ki seng kiba ïatreilang ki long ka NPP, BJP, UDP, HSPDP, PDF bad kiwei. Kan pher aïu mynta ruh ha ka MDA 2.0? La jied katkum ka jingkwah bad ki MLA ki donkam ïa ki nombor kiba biang ban ïoh ïa ka sorkar kaba skhem. Lada ïatreilang baroh ki seng kynthup ki MLA khlem seng, lait noh ka NPP bad BJP, ka jingdon paid kan long 31 la 28 ngut. U nombor 31 u dei uba donkam tam namar ha ka ïingdorbar thawaiñ kaba don 60 ngut ki MLA, ka seng lane ka kynhun ka donkam palat 31 ngut ki dkhot ban thaw sorkar.
Ïa kano-kano ka sorkar, hap ban thaw da ka jingbun paid, ym da ka jingsngew shimet. Ki MLA kin hap ban ïa peit shano ba kham bun hashwa ban shim rai. Ki don kiba kwah da ka sorkar kaba khlem NPP bad BJP. Kata ruh la lah ban thaw lada baroh kitei ki 31 ngut ki la shim da ka rai rangbah ban ïalong lang kawei. Hynrei barabor kam ju long kumta. Ym baroh kiba skhem jingmut. Ym baroh kiba shlur. Ym baroh ki dei ki rangbah. Ym baroh kiba don ka mynsiem jong ka jingïaishah. Ki don kiba kwah lut mynta-mynta. Ki don kiba rhah. Ki don ki bym lah ban shim rai nalade bad hap ban shu pan jingmut na kiwei. Ki don kiba synjor ha ka jingmut jingpyrkhat. Baroh ngim ïa long kumjuh kam pher wat lada kata ka ktah ïa ka jingsngew jong kiwei.
Ngim dei ban da ïa kynnoh than ïano-ïano namar ka dei ka rai kaba la ai da ki paidbah kiba bun. Haba ki pynjop duna ïa kiwei ki seng, ym lah ban shu ïa thaw sorkar jubor. Lada leh jubor, kata ka sorkar ka lah ban shu khyllem noh khlem dei por. Nalorkata, mano bym kwah ba ka BJP kan don lang ha kajuh ka sorkar haba ïa ka Sorkar Pdeng la ïalam da ka BJP? Ka jingsngew ka long ba lada don lang ka BJP ha kajuh ka sem, ka pisa bad kiwei ki lad jingïarap na ka Sorkar Pdeng kin tuid kham bun sha Meghalaya, hynrei lada don da kiwei pat ki seng, ka BJP ka lah ban ym ai bha ïa ka bhah ka bynta. Hynrei kata ka dei tang ka jingpyrkhat biej. Ki da don da ki kyndon ha ka Riti Synshar bad ha ka jingtreikam jong ka Sorkar Pdeng ba ka hap beit ban ai jingïarap sha baroh ki jylla. Hooid, ki don beit ki khep ba ka Sorkar Pdeng ka pynkylla kam saiñpyrthei sa ïa ki skhim bad kata ka dei ka jinglong poh dor jong ki nongïalam Sorkar Pdeng ki bym burom shuh ïa ka Riti Synshar bad ki aiñ ki kanun.
Kumba ka long mynta, ki paidbah kin hap ban ïa pdiang beit noh ïa ka sorkar MDA 2.0 lane MDA II namar ym don shuh da kawei pat ka lad. Ki paidbah hi kiba la ai ïa ka rai kaba thohmut thohmat bad kaba dkoh. Ki la dei ban shu pynjop beit 31 ngut ki MLA ïa kawei ka seng la ka dei kano-kano ruh bad ym ban shu jied khyndiat nangne bad khyndiat nangtai. Ki paidbah ki la pyndep ïa ka kamram, hynrei kata ka jingpyndep ka long kaba dkoh haduh ba ka la pynbor ïa ki MLA ban shu leit sdien ldui ha ka bos kaba la sdang ban khapngiah. Mynta lei kata ka bos ka la dap smam namar ki la don haduh 45 ngut ki nongshong. Lehse don ruh kiba hap shong ha madan lane ban sdien lane ban shong ha tnum. Tangba kam pher, ka dang dei hi kajuh ka bos, bad kumba ka paw mynta, kane ka bos kan ïaid beit thiaw haduh kaba kut jong ka san snem, kata, haduh u Lber 2028.
