Islamabad, Lber:
Uwei u ‘riew kheiñ duh uba la pyndonkam da ka thuk thuk bad uba la kieng bad pyndait da ki bom ba khlaiñbor, u la leit ban tynrah bad pynbthei ialade ha kawei ka trok kaba kit ia ki shipai. Ha katei ka jingjia, khyndai ngut ki shipai ki la khlad hashen bad kiwei pat ki la mynsaw, la iathuh ki khubor na ka tnat shipai.
Katei ka jingjia ka la jia ha ka step jong ka Lah Sngi U Blei ha ki bynta jong ka thaiñ Balochistan. Na ka liang jong u Agha Samiullah, uba dei Deputy Commissioner jong ka Kachhi district kaba hap hapoh katei ka thaiñ ha ka jingai jingkren sha kawei na ki lad pathai khubor, u la ong ba katba ka kali ba kkit ia ki shipai ka dang iaid lyngba ka jingkieng Kambri, uwei u riew kheiñduh u la wan ban tynrah ia katei ka trok bad kynsan kynsan ka la mih ka jingbthei kaba jam bad wanrah ka jingiap bad jingmynsaw jong ki shipai.
Shuh shuh, na ka liang jong u deputy commissioner u la bynrap ruh da kaba ong ba katei ka trok ka dei kaba kit ia ki 22 ngut ki dkhot shipai jong ka Balochistan Constabulary, kaba dei kawei na ki tnat bad kynhun pulit iakhun lehnoh jong ka Balochistan.
“Katei ka kali kaba kit ia ki kynhun shipai ka dei kaba dang shu wanphai na Sibi hadien ba ki lah ep ban pahara ha katei ka thaiñ kaba la pynlong ia ki tamasa baher bapher bad katei ka kynhun ki pulit ka dei ruh kaba thmu ban leitphai sha ka nongbah Quetta, hynrei kane ka jingjia ba sngewsih pyrshah ia ki ka la jia”, la ong u Agha Samiullah.
Halor jong klatei ka jingjia, na ka liang jong u Agha Samiullah u la pyntip ba haduh ka janmiet jong ka lah sngi u Blei, ym pat shym ba la don ki kynhun lehnoh kiba la kam ba ki la leh ia katei ka kam pyntriem bad kam thombor. Na ka liang jong u Mehmood Notezai, uba dei u heh pulit ka Kachhi u la ong ba mar ia ioh jingtip halor kane ka jingjia, mar mar ka kynhun pulit lem bad ki pulit pynlip ding ki la ia her sha katei ka jaka bad la ioh ban pynkit noh ia baroh kiba la mynsaw sha ka jaka sumar jong ka Combined Military Hospital kaba ha Sibi.
Kumban shu pynkynmaw, ka Balochistan ka dei kawei na ki thaiñ kaba la mad bha ia shipai ki jingiaumsnam bad ki jingiakhun hapdeng ki kynhun kieng atiar jong ki jaitbynriew Baloch pyrshah ia ki bor pahara bad kiba la iakhhun mynta lah da ki snem na ka bynta ban ioh ia ka jinglaitluid na ka jingsynshar jong ka sorkar Pakistan bad ka dei ruh kawei na ki bynta jong ka Pakistan kaba don bun tam ki mar poh khyndew kiba iaid iew bha ha ka pyrthei.
