Shillong, Lber 06:
U President ka Meghalaya Pradesh Congress Committee (MPCC), Bah Vincent H. Pala u la ong ba ka jingwan jong u Myntri Rangbahduh ka ri, u Narendra Modi ha ka Sngi Ba-ar ban ïashim bynta ha ka jingbam smai jong ka Kynhun Myntri ka long tang ban pynïaid ïew ba ka Bharatiya Janata Party (BJP) ka ïoh ban thaw Sorkar ha ka Jylla.
“Nga kwah ban pynkynmaw ïa ka BJP bad ïa phi baroh halor kaei ba ka ong ha ka por ïalap ilekshon ha ka Jylla bad kaei kaba mih na ka risol. Ka BJP bad ki seng kiba ïatehlok bad ka, ka NPP bad kiwei-kiwei…ka dei ka ‘jingshong kurim jong ka jingmyntoi’,” la ong u Bah Pala haba kren sha ki lad pathai khubor ha AICC HQ, New Delhi ha ka Lah Sngi U Blei.
Haba kdew ba u Myntri Rangbahduh ka ri, u Narendra Modi, u Myntri ka tnad kam pohïing ka Sorkar Pdeng, u Amit Shah bad u President ba rangbah ka seng, u J.P. Nadda ki la wan sha ka Jylla ban ïalap ilekshon, u la ong, “Baroh kine ki nongïalam ki la kynthoh, kynnoh ïa ka NPP, hynrei hadien ba ka BJP ka la jop tang 2 tylli na ki 60 tylli, ha ka sngi kaba bud ki la ïasnoh kti lang.”
U la ong ruh ba dei ha kane ka rukom ba ka BJP ka pynbieit ïa ki nongshong shnong ka ri kumjuh ïa ki nongshong shnong ka Jylla.
U Bah Pala u la pynsngew ba kaei kaba ka BJP ka la kdew ha ki mat ilekshon bad kaei kaba ka la leh hashuwa ka ilekshon (ha ka por ïalap ilekshon) ka la shet kylla ïa ki paidbah lyngba ki jingkular ba lamler jong ka.
“Mynta ka BJP ka don hadien ka NPP, ka la pynma ruh ïa ki seng ’riewlum tang ba kin ïa wan lang bad ki,” u la ong.
Ha kajuh ka por, u la ong ba ka BJP kam shym la kyntiew ïa ki ‘vote’ jong ka hapoh ka Jylla bad ka don palat 9.5% ha baroh ki ilekshon la ka long ha ka ilekshon sha ka Lok Sabha bad ka ïingdorbar thawaiñ ka Jylla ha kaba ka la jop tang 2 tylli.
“Ka jingwan jong u Myntri Rangbahduh lem bad kiwei-kiwei ki nongïalam lashai ka sngi ka long tang ban pynïaid ïew ba ka BJP ka ïoh ban thaw Sorkar ha ka Jylla,” u la ong.
Shuh shuh u la bynrap, “Kane ka kdew shai kumno ki la shet kylla ïa ki nongshong shnong ka Jylla bad kumno ki pynïaid ïew ïalade ha kylleng ka ri.”
Nalor kane u la ong ba ka Congress kam duna haba phai sha ki nongïalam naba u Rahul Gandhi, Salman Khurshid, Jairam Ramesh, Sachin Pilot, ki la wan sha ka Jylla na bynta kane ka ilekshon ba dang shu dep.
