Shillong Lber 06:
Ka Kynhun Myntri kaba thymmai jong ka Sorkar Meghalaya Democratic Alliance (MDA-II) ka dei kaba khleh lang ki briew kiba la kham rim bad kham tip ha ryngkat bad khyndiat ngut kiba dang shimti thymmai kum ki Myntri Sorkar.
Hapoh ka jingïalam u Conrad K Sangma kum u Myntri Rangbah ha ka sien ba-ar, kane ka Kynhun Myntri ka don ïa u Myntri Rangbah uba la dep ban trei ha ka samoi kaba la dep hapdeng kiba bun ki jingeh bad jingtynjuh. Nalor jong u, ki don sa kiwei pat kiba la kham rim kum u Bah Prestone Tynsong, Kong Ampareen Lyngdoh, Bah Paul Lyngdoh kiba la long teng ki Myntri Sorkar ha ki snem kiba la leit kiba peit ïa ki tnat treikam bapher bapher.
Ka jingkynthup ïa u AT Mondal hapoh ka Kynhun Myntri lehse kan nang pynkhlaiñ shuh shuh ïa ka rukom treikam namarba u dei u briew uba la sngewthuh bha ïa ka rukom treikam naduh ba u la long teng u Myntri Sorkar bad kum u Lamphang barim ka Ïingdorbar Thawaiñ ka Jylla.
Kumba ka paw, kane ka Kynhun Myntri jong ka Sorkar MDA-II ka kham khlaiñ lada ïanujor bad ka Kynhun Myntri ha ka por jong ka Sorkar MDA-I.
Mynta ka sien, ka Kynhun Myntri ka don tang lai ngut kiba ïoh long Myntri ha ka sien banyngkong, ha kaba 2 ngut ki dei kiba la dep long MLA teng, bad tang uwei pat u dei uba la shahjied MLA ha ka sien banyngkong bad ïoh long Myntri ruh ha ka sien banyngkong.
Ka shong mynta sa ha ka Kynhun Myntri kumno ban pyni ïa ki kam bad wanrah ïa ki mat treikam kiba ïarap ban kyntiew ïa ka Jylla.
