Shillong, Lber 06:
U MLA ba dang shah jied biang na ka Nongkrem konstitwensi, u Bah Ardent Miller Basaïawmoit, ha ka Lah Sngi U Blei kata ka 6 tarik u Lber, 2023, u la ong ba na ka liang ka seng Voice of the People Party (VPP) kin don beit ha ka liang pyrshah.
Haba kren hadien ba la wai ka jingbam smai ki MLA ha ïingdorbar thawaiñ halor ka jingleit pynïasoh ka UDP bad ka NPP na ka bynta ban thaw sorkar thymmai, u la ong ba ki seng kiba sah kin don beit ha ka liang pyrshah.
U Bah Ardent u la ïathuh ba namar ka jingduna ka jingbun paid, ka seng UDP ka khlem lah shuh ban pynbiang ïa ki MLA na ka bynta ban wanrah ïa ka sorkar seng riewlum.
Nalor kata, u la ong ruh ba ka jingphet noh jong arngut ki MLA ka HSPDP myn ha ka 3 tarik ki dei tang ki daw kiba shu thaw bad kaba la pynkhreh lypa.
Halor ka jingïakhih ki sengbhalang ban dawa thaw da ka sorkar seng riewlum, u Bah Ardent u la ong kane baroh ka shong ha ka jingpyrkhat jong ki.
“Ngi la leit ha ka jingïalang ba la khot da ka UDP ban thaw ïa ka sorkar seng riewlum, hynrei ki la jah shwa ki MLA na ka seng HSPDP, hynrei mynhynnin ka sngi u Blei la shu pyntip ïa ngi tang da ki katto katne minit shwa ban mih ha ki lad pathai khubor ba ka UDP bad PDF ki la leit kyrshan ïa ka seng NPP bad BJP namar bym biang ki nombor” u la ong.
U la ai jingïaroh ïa u director uba la tbit shisha ban shna ïa ka drama lyngkot kat haduh ba ka la kut tang ban shu pynthame ïa ki paidbah ban pyni ba ki la pyrshang ban ïatylli ki seng riewlum.
Kumta u kyntu ïa ki paidbah nangne shakhmat kin jied beit ïa ka seng kaba don nongrim ka bym kylla ktien.
“Lada ngi don ha ka sorkar ngi dei ban don halor ka nongrim, lada ngi shong ha ka liang pyrshah ruh ngin rah ïa ki mat kiba khia jong ka jaidbynriew” u la ong.
