Tokyo, Lber:
Ka tnat pahara duriaw jong ka Japan ha ka Lah Sngi U Blei ka la pyntip ba iwei i la khlad noh bad 6 ngut pat ki dang jah rngai hadien ba ka lieng kaba ki shong ka la kylla ha ki bynta jong ka duriaw ha Tokyo, kaba la hap ruh hapoh ka jingkhmih jong ki Senkaku islets.
Watla katta, ym pat lah ban pyntikna la katei ka lieng ka dang kylla ha ka Sngi U Blei ne naduh ki sngi ba la leit, hynrei ka tnat pahara duriaw jong ka Japan ka la pyntip ba ka la iohi ia katei ka lieng kaba la per ha ka duriaw hajan jong katei ka dew lynnong.
La ioh jingtip ruh ba kitei kiba ngat ha katei ka jingjia ki kynthup ia utei uba long u nong Taiwan bad 6 ngut ki nong Indonesia.
La ong ba ha ka por kumba 9:15 jong ka step Lah Sngi U Blei, la lap ia ka met jong utei uwei na ka iingrit kaba don harud duriaw bad ka ID kaba don ha utei u briew, ka pyni ba u dei u nong Indonesia.
Kumta ruh ka tnat pahara duriaw ka dang ialeh ban wad shuh shuh sa ia kitei ki 6 ngut kiba dang jah rngai naduh ba katei ka lieng kaba ki shong ka la kylla noh.
Shuh shuh ruh la ong ba kitei ki tnat pahara duriaw ki dang iatrei lang bad ki para shipai pahara duriaw jong ka Taiwan naka bynta ban wad ia kitei kiba dang jah rngai tad haduh kane ka kynti.
Kumjuh ruh na ka liang ka tnat kam bar ri jong ka Taiwan, ka la kam ba katei ka lieng ka dei kaba mih na Taiwan bad ka dei ka lieng tong doh kaba la dep ioh jingbit na Taiwan. Kumta la suba ba katei ka lieng ka la kylla noh ha ki bynta hajan ka dew lynnong Senkaku.
Hadien ba la wad jingtip bha, la shem ba katei ka lieng ka dei kaba mih na ka thaiñ Keelung jong ka Taiwan ha ka Lah Sngi U Blei jong ka taiew ba la leit, bad ka la pyntip sha ki tnat pahara duriaw jong ka Taiwan ha ka Sngi U Blei na ka bynta ban leit iarap.
