Bhubaneswar, Lber:
Ki la don kumba saw ngut ki briew kiba la ïap bad saw ngut kiwei pat ki la mynsaw jur hadien ba don ka jingbthei ha kawei ka jaka shna bom pataka kaba la pyntreikam beaiñ ha Khurda distrik kaba don ha Odisha hynnin ka sngi, la ïathuh ki pulit.
Kane ka jingjia ka la jia ha ka shnong Bhusandapur kaba don ha ka thaiñ Tangi, ka jaka kaba jngai kumba 40 km na Bhubaneswar, haba ïa ki bom pataka la shna ha katei ka ïing na ka bynta ka jingrakhe ïa ka jinglehkmen Holi ka ban sa long, la ïathuh ki pulit.
Kane ka jingjia jong ka jingbthei ka la j ia ha ka por ba ki briew kiba shong hapoh kane ka ïing ki la don bynta ban shna ïa ki bom pataka ïa kiba la thmu ban pyndonkam ha ka por ba don ki jinglehkmen.
Haduh ba la thoh ïa ka khubor ym pat tip ïa ka daw tynrai halor ka jingjia kaba la wanrah ïa ka jingbthei kaba la shim ïa ka jingim jong ki mynsiem briew bad ka jingjulor kaba bun.
Ka ïing ha kaba ïa ka jaka shna bom pataka la shna beaiñ ka la julor lut ha kane ka jingjia.
Ki pulit pyllip ding ki la hap ban pynlut da kumba katto katne por na ka bynta ban pyllip ïa katei ka ding bad ban pyllait im ïa ki briew.
Ki la don kumba saw ngut ki briew kiba la ïap hashen bad saw ngut kiwei pat ki la mynsaw jur na ka jingpluh ding bad ïa kine la pynkit sha ka jaka ai jingsumar, u la ong ha kaba u la bynrap shuh shuh da kaba ong ba kine ki dang don hapdeng ka jingshah sumar.
U District Collector jong ka Khurda u K Sudarshan Chakrobarty u la ong ba la don tang kawei ka met ïap jong kitei ki lanot kaba dang shah ithuh haduh ba la thoh ïa ka khubor. “Yn sa pynshitom da kaba tyngeh pyrshah ïa ki briew kiba la donkti ha ka jingjia. Kam shym la don ka jingai jingbit jong ki bor sorkar na ka bynta ban shna ïa ki bom pataka ha katei ka ïing,” u la bynrap.
