Shillong, Lber 06:
I Bah Enshon Lamare, i ba la kynjoh sha ka 78 snem ka rta, ba dei i kurim jong i Kong Wonmai Warjri ba shong ba sah ha Mawlai Phudmuri, i la khlad noh ha ka step jong ka Lah Sngi U Blei ha ka ïing sah jong i.
Ka jingleit ontep ïa ka met kaba sah jong i Bah Enshon kan long ha ka 8 tarik Lber, 2023, ha ka por 2:00 baje nohphai sngi ha u Lum Jingtep ka Balang Catholic kaba don ha Mawlai Mawdatbaki, Pata.
I Bah Enshon i la iehnoh shadien ïa la i kurim lem bad 10 ngut ki khun. Ka jingkhlad jong i ka dei na ka jingshitom kaba la ban ha kine ki snem.
I Bah Enshon i dei ba la shongthait na ka kam na MeECL bad i dei ba la paw bha hapoh ka jylla ha ki kam ak phlim. Ki phlim kiba i la ïadon bynta ki kynthup ‘Ka Mon Ba Jwat’, ‘Hep’, ‘Onataah’, bad ka phlim kaba khatduh ka dei ka ‘Ïewduh’. Hynrei i khlem ïashim bynta shuh ha ki kam ak phlim hadien ba i la don hapdeng ka jingshitom.
Nalorkata, i Bah Enshon i la long ruh kum u dkhot ka Seng Biria U Khasi (SBUK) kaba dei ka kynhun ki rangbah kiba ju pynlong ïa ki tamasa biria ha kylleng.
