Mawkyrwat, Lber 06:
Ki khynnah skul jong ka Mawthawpdah Govt LP School bad Mawthawpdah Presbyterian Upper Primary School ryngkat ki nonghikai da ka khmat kaba sngewsih ki la hap ban mih noh na la ki skul bad leit phai noh sha la ki jong ki iïng ki sem hadien ba ki paidbah jong ka shnong Mawthawpdah hapoh ka jingïalam u Bah Sparlindro Lyngdoh uba dei u Secretary shnong ki la leit ban khang tala noh ïa kitei ki ar tylli ki skul.
Kane ka la jia ha ka 6 tarik mynta u bnai ha ka shnong Mawthawpdah, SWKHD ha ka por kumba 10 baje eiei mynstep.
Na ka liang u Bah Sparlindro Lyngdoh haba kren sha ki lad pathai khubor u la ïathuh ba ka daw kaba pynlong ïa ki paidbah ban khang tala ïa kitei ki skul ka dei namar ba ki don ki kynrum-kynram ha kaba ïadei bad ka rukom pynïaid ïa kitei ki skul.
Ha kaba ïadei bad ka Mawthawpdah Presbyterian UP skul, u Bah Sparlindro u la kynnoh ba mynshwa kane ka skul ka dei jong ka shnong Mawthawpdah, hynrei naduh u snem ar hajar shaneng la pynïaid donbor noh ïa kane ka skul da ka Balang Presbyterian Mawthawpdah khlem ka jingpyntip ïa ka shnong bad ïa ki paidbah.
Nalor kata, u la kynnoh ruh ba kane ka skul haduh mynta ka dang don ïa ka ram ha ka jingpyntrei ïa ka madan skul naduh u snem 1991 kaba ki paidbah haduh mynta kim pat ïoh ïa la bai trei.
Ha kaba ïadei pat bad ka Mawthawpdah Govt LP skul, u Bah Sparlindro Lyngdoh u la ïathuh ba ka daw kaba pynlong ban khang tala ïa katei ka skul ka long namar ka jingshah pynjot pynpra noh ka iïng skul jong ka Govt. LP skul khlem ka jingpyntip lang ïa u paidbah nongshong shnong.
U la ong ruh, balei ki pynjot pynpra noh ïa kane ka iïng skul kaba ka shnong ka la ithuh bad don ka jingkitkhkieh bad balei ki rah bad pynlong skul noh ïa ki khynnah ha ka skul jong ka SSA.
Kumta na ka liang u Bah Sparlindro Lyngdoh ryngkat ki paidbah ki dawa ïa ki bor ba khlieh duh kiba peit ïa ka tnat pule puthi, ki nongpynïaid distrik, ki nongpynïaid skul, ki nongpynïaid Balang bad ki bor shnong ba ki dei ban wan pynshai paidbah noh mardor halor kitei ki kynrum-kynram bad ki la byrngem ba lada kim ïoh ïa ka jingpynshai kim banse ban pynlong jaka theh ñiut noh ïa kitei ki ar tylli ki skul.
