Kohima, Lber:
Ki bor sorkar jong ka jylla Nagaland ha ki khyndiat sngi kiba la leit noh ki la pyntip ba ki dkhot jong ka sorkar synrop hapdeng ka seng NDPP bad BJP kin sa bam smai ha ka 7 tarik mynta u bnai (mynta ka sngi) ha ka jingïalang bam smai ka ban sa wan ban ïashim bynta lem da u Myntri Rangbahduh jong ka ri, u Narendra Modi.
Kum ban shu ïathuh hangne, ka seng Nationalist Democratic Progressive Party (NDPP) lem bad ka seng BJP ki la ïakhun ïa ka ilekshon sha ka Ïing Dorbar Thaw Aiñ jong ka jylla kaba la pynlong ha ka 27 tarik u Rymphang da kaba ïalang paralok bad ïasam ïa ki konstitwensi da 40:20. Ha katei ka ilekshon kitei ki 2 tylli ki seng saiñ pyrthei ki la ïoh ïa ka jingjop na 37 tylli ki thaiñ (25 ka NDPP bad 12 ka BJP), bad ïoh biang ïa ka lad sa shisien ban thaw ïa ka sorkar kaba thymmai.
Watla kam pat shym la don kano kano ka jingkam jong kitei ki seng ban thaw ïa ka sorkar, na ka liang ka seng BJP ha ki khyndiat sngi kiba la leit noh ka la pyntip ba u president jong ka NDPP – naiphiu Rio un shimti biang ïa ka shuki kum u Myntri Rangbah jong ka jylla.
Ha ka ilekshon kaba la pynlong ha u snem 2018, ka NDPP lem bad ka BJP ki la ïakhun ïa ka ilekshon da kaba ïasam ïa ki jaka da 40:20. Ha katei ka ilekshon, kitei ki 2 tylli ki seng ki la ïoh rah ïa ka nam jop na ki 30 tylli ki thaiñ.
Haba phai shuh shuh sa sha kawei ka khubor la ïathuh ba na ka liang ka Nationalist Democratic Progressive Party Legislature Party (NDPPLP) jong ka Ïing Dorbar Thaw Aiñ ba 14 jong ka jylla Nagaland ha ka jingïalang jong ka ba la pynlong ha ka shlem treikam jong ka seng ka la jied ïa u Neiphiu Rio kum u nongïalam bad pynkhamti ruh ha u ba un ïalam ïa ka sorkar kaba yn sa thaw thymmai.
Ha katei ka jingïalang, na ka liang ki nongïalam jong ka NDPPLP ki la ai ïa ka jingkhublei kyrpang ïa ki nongshong shnong jong ka jylla kiba la lah sa shisien ban shaniah bad ai jingkyrshan hapoh ka jingïalam jong ka NDPP bad kumjuh ruh hapoh ka jingïalam jong u Myntri Rangbah – Neiphiu Rio ha ka ilekshon kaba la dep.
Ha katei ka jingïalang ba la pynïaid da u Secretary General ka NDPP – Abu Metha, u Rio bad u President jong ka seng – Chingwang Konyak la ai ïa ka jingkhublei Kitbok kitrwiang ïa baroh ki MLA jong ka seng NDPP kiba dang shah jied ban long ki nongmihkhmat ha Ïing Dorbar Thaw Aiñ.
Na ka liang kitei ki nongïalam ki la kyntu ïa baroh ki dkhot ba kin trei shitom na ka bynta ka bha ka miat jong ki nongshong shnong ka jylla bad kumjuh na ka bynta ban pynurlong ïa ki kular kiba ki la khlei hashwa ban pynlong ïa ka ilekshon.
Na ka liang ka NDPPLP ka la pynbna ruh ba kan trei na ka bynta ban wanrah ïa ka shong suk shong saiñ bad kumjuh ruh ïa ka roi ka par na ka bynta ka jylla Nagaland – ban kyntiew ïa ka jylla sha ki kyrdan kiba kham shaneng.
