Shillong, Lber 06:
Lai ngut ki briew ki la shah kem ha ki pulit ka East Jaiñtia Hills ha ka Lah Sngi U Blei ha ryngkat ka jingkurup ïa u drok Heroin.
Katkum ka jingtip ba la ïohlum na ki pulit, la ong ba ki la ïoh khubor ba uwei u briew ba la tip kum u Raju Dkhar u la don ha lynti ban wan na Kalain (Silchar) ryngkat bad u drok. Ki pulit ka ANTF bad ki pulit ka Umkiang hapoh ka jingïalam u DSP (Crime), u B. Bhattacharjee, ki la pynlong ïa ka jingpynap shrip, bad ki la ïoh bat ïa u Raju lem bad uwei u paralok jong u.
Ha ka jingwad na ka kali, ki pulit ki la lap hynñiew tylli ki synduk sabon ba la thep da u drok Heroin, bad haba la kheiñ lang, utei u drok u don 75 gram. Ryngkat bad u Raju, ki pulit ki la ïoh kem ruh sa ïa uwei u briew ba la tip kyrteng kum u Lamphrang Kyndait.
Ha ka jingtohkit, ki pulit ki la ong ba u Raju u la phla ïa ka kyrteng jong u Jop Siangshai uba dei u nongbei tyngka bad ruh u ban shim ïa utei u drok. Namarkata, ki pulit ki la kem noh sa ïa Jop Siangshai na Khliehriat. Ki pulit ki dang pynlong ïa ka jingtohkit ban lap ïa kiwei pat kiba donkti, bad la pynrung ruh da ka jingujor ha thanat Lumshnong.
Nalor u drok, ki pulit ki la kurup ïa kawei ka kali Maruti 800 bad saw tylli ki Mobile Phone.
