Aizawl, Lber:
Ka Federation of Mizoram Government Employees and Workers (FMGE&W) – ka shatri trei kam jong baroh ki nongtrei sorkar ka jylla Mizoram ha ki khyndiat sngi ba la dep ki la pynbna ban weng noh ïa ka jingthmu pynlong jingïakhih kaba ki la buh ban pynsdang ha ka 6 tarik tad haduh ka 7 tarik mynta u bnai.
Kat kum ki jingïoh lum jingtip la ïathuh ba na ka liang katei ka synjuk dang shen ka la pynbna ba kan pynlong da ka jingïakhih ban dawa na ka sorkar jylla ba ka dei ban siew tista ïa ka tulop jong ki nongtrei sorkar bad kumjuh ruh ban pynkiew ïa ka Dearness Allowance (DA). Na ka liang ka synjuk ka la byrngem ruh ba hapdeng ka 8 bad 9 tarik mynta u bnai, baroh ki dkhot jong ka synjuk kin shim shuti bad sangeh leit trei ha kitei ki sngi.
Kat kum ka jingïathuh jong u general secretary ka FMGE&W – J. Ramdinmawia u la pyntip ba na ka liang ka synjuk ka la weng noh ïa katei ka jingthmu ban pynlong ïa ka jingïakhih hadien ba u Myntri Rangbah jong ka jylla – Zoramthanga u la kular ban shim ïa ki lad ki lynti kiba bha eh na ka bynta ban pynurlong ïa ki mat jingdawa jong ka synjuk.
La ïathuh ba na ka liang ki nongïalam jong ka FMGE&W ha ka Sngi Saitjaiñ ba la dep, ki la leit ban ïakynduh ïa u Myntri Rangbah jong ka jylla u ba la kular ruh ban pynkiew ïa ka DA da 4% – ka ban trei kam naduh ka 1 tarik u bnai Ïaïong jong une u snem ba mynta.
Halor ki mat ba ïadei bad ka jingkyntiew ïa ka rta pension na ka 60 sha ka 62 snem ka rta, u Myntri Rangbah u la kular ha ki nongïalam ka FMGE&W ba ïa katei ka mat yn sa rai ha ka jingïalang syllok ka ban sa pynlong bad ki nongïalam ka FMGE&W, ki bor sorkar ka tnat Pla Tyngka, ki seng samla pyle bad kiwei kiwei ki seng trei mon sngewbha. U la ïathuh ruh ba ïa katei ka jingïalang yn la pynlong bad pynkhreh da ka tnat Personnel & Administrative Reforms.
