New Delhi, Lber:
U Symbud Myntri Rangbah barim jong ka Delhi bad u nongïalam jong ka seng Aam Aadmi Party (AAP) u Manish Sisodia u la shah hukum ba un shong ha patok haduh ka 20 tarik, Lber hadien ba ka jingshah set jong u ha ka kynhun CBI, hashwa ka la don ka jingdawa ban pynjlan ha ka ban set ïa u sa kumba ar sngi, ha kaba kane ka la kut.
U la shahkem ha ka 26 tarik, Rymphang halor ka jingshah kynnoh ba u la pyndkoh treikam ha kaba ïadei bad ka jingpyntreikam halor ka kyiad ha Delhi.
Hashwa, ka Supreme Court ka la kyntait ban tuklar halor kane ka jingjia bad ong ba u la don bynta ruh ban pyndep ïa ki katto katne ki kam kiba long katkum ka aiñ ïa kaba la wanrah hakhmat ki ïingbishar kiba kham halor.
Hadien kane, u la leit sha Rouse Court kaba ha Delhi na ka bynta ban pan jamin ha kaba la rai ban bishar bniah halor kane ha ka 10 tarik, Lber.
U Sisodia u la shah phah da kumba san sngi ha kti jong ka kynhun CBI hadien ba u la shahkem ha ka 26 tarik, ,Kyllalyngkot.
U la leit sha ka ïingbishar bahakhliehduh na ka bynta ka jingkyrpad jamin, ha kaba la kyntait noh ïa ka jingkyrpad jong u.
Ka la ai jingmut ba u la dei ban leit hakhmat ki ïingbishar kiba kham hapoh bad hakhmat ka High Court.
U la leit mih sha ka ïingbishar kaba don ha Delhi na ka bynta ban kyrpad jamin, ha kaba la rai ban khmih bniah halor kane ha ka 10 tarik, Lber. Ha kaba ïadei bad kane la aiti noh ïa u sha ka kynhun CBI.
U nongaiktien jong ka sengAAP u Saurabh Bhardwaj u la pynshisha da kaba ong ba u Sisodia u la shah pynshitom bha ha ka kynhun CBI bad kine ki heh jong kane ka kynhun ki la shu phah phla jubor ïa u.
Ka ïingbishar ka la hukum ïa ka kynhun CBI ba kam dei ban kylli biang kijuh ki jingkylli ïa u Sisodia.
“Lada phi don kiei kiei kiba dang thymmai sa kylli jingkylli ïa u,” la ong u nongbishar.
U nongïasaid aiñ jong u Sisodia, u Dayan Krishnan, u la ong ba ha ka por jong ka jingbishar bniah ba ka jingbuh ïa u ha patok ne set ïa u na ka bynta ka jingtohkit kan ym wanrah ïa ka jingseisoh naba ki la don ki jingkylla ha kaba ïadei bad ka jingjia.
U la bynrap da kaba ong, ba ka kynhun tohkit kam lah ban hukum ha ka ban bteng ïa ka jingset ïa u.
U Mynri Rangbah jong ka Delhi u Arvind Kejriwal, ha ryngkat 8 ngut ki nongïalam jong ka liang pyrshah ki la phah da ka shithi sha u Myntri Rangbahduh u Narendra Modi ha kaba la pynrem jur halor ka jingshahkem jong u Sisodia.
Ka Mamata Banerjee jong ka Trinamool Congress, u Uddhav Thackeray jong ka Shiv Sena (UBT), u Sharad Pawar jong ka NCP bad u K Chandrashekar Rao jong ka BRS ki la long ki katto katne ngut ki nongïalam kiba la kynthoh jur halor ka jingpyndonkam bakla ïa ka kynhun tohkit jong ka sorkar. Ki nongbud jong ka seng AAP ki la pynlong ïa ka jingïakhih ha Delhi ha ka sngi Saitjaiñ haba u Sisodia u la shah ïalam sha Rouse Avenue Court.
Kiba bun na ki nongïalam jong ka seng ki la ïalum hakhmat ka jaka treikam jong ka seng ha ryngkat ka jingbat ïa ki Placard bad pyrta ruh da ki kyntien ba pyrshah.
U Sisodia, ha ryngkat u Myntri barim jong ka Delhi u Satyendar Jain, ki la iehkam noh na ka sorkar hadien ka jingshahkem jong ki.
