Shillong, Lber 07:
Ka Bharatiya Janata Party (BJP) Meghalaya ha ka Sngi Ba-ar ka la rai ban ai Myntri da kaba ïakylliang hapdeng u Bah A.L Hek uba dei u MLA ka Pynthorumkhrah konstitwensi bad u Bah Sanbor Shullai uba dei u MLA ka South Shillong konstitwensi.
Ha ka shithi ba la phah da u President ka BJP Meghalaya u Bah Ernest Mawrie sha u National President ka National People’s Party (NPP), la ong ba ka BJP bad 2 ngut ki MLA ka la mynjur ban ailad ïa u Bah A.L. Hek ban long u Myntri Sorkar na ka bynta 2 snem shiteng ka ban kut ha ka 7 tarik Nailar 2025.
La ong ba hadien kane, yn sa shimti sa u Bah Sanbor Shullai kum u Myntri Sorkar haduh ba kut ka samoi treikam ka Sorkar.
Kumta ha kane ka shithi kaba la ïohpdiang da u Conrad, la don ruh ka jingsoi kum ka jingmynjur lang da baroh ar ngut ki MLA, u Bah A.L Hek bad u Bah Sanbor Shullai nalor u Dr M Chuba Ao, uba dei u National Vice President ka BJP bad uba dei peit ïa ka BJP ha Meghalaya.
Kumta la kyntu ïa baroh ar ngut ki MLA ka BJP ban burom ïa ka rai jong ka seng bad ïatreilang ban pyntikna ban don ka synshar kaba bha bad ban pyntinkan ba kan don ka jingpeit ïa ka rukom treikam. La ong ba ka bynta jong ki MLA ka BJP ka long ban pyni sha ki paidbah ïa ka jingtreikam kaba biang bad kaba khuid.
Ha katei ka shithi kaba la phah sha u Myntri Rangah ka jylla, ka BJP ka la kyntu ba dei ban burom ïa ka rai jong ka seng kata ba baroh ar ngut ki MLA ka BJP kin ïoh ka lad kaba ïaryngkat ban shakri khamtam da kaba peit ruh ïa jinglong rangbah jong ki bad ka jingkyrshan kaba ki ai ïa ka Sorkar.
Haba kren sha ki lad pathai khubor, u Bah Sanbor u la ong ba ïa katei ka rai ban sam mar ar snem shiteng ka shuki Myntri ka dei ka rai kaba la shim ha ka jingïalang jong ka BJP Meghalaya ha ka jingdon ryngkat lang jong ki nongtrei ka seng bad kam dei kum ka rai kaba la shim ha u snem 2018 kaba shu long tang da ka ktien.
“Nalor ba la phah ïa ka shithi sha u Myntri Rangbah, na ka liang ka BJP Meghalaya, ka la phah ruh sha u National President ka BJP, u J.P Nadda bad sha u General Secretary, u Rituraj Sinha” la ïathuh u Bah Sanbor.
Shuh shuh u Bah Sanbor u la ong ba kam don kano kano ka jingktah halor ka jingshimti jong u kum u Myntri ka Sorkar jylla hadien ka ar snem shiteng, hynrei un ïai ap ïa la ka pali ba un bat kum u Myntri ka Sorkar jylla bad kum u nongmihkhmat paidbah, un pdiang ïa kaei kaba la pynkhamti ha u ban trei na ka bynta ka bha ka miat jong u paidbah ka konstitwensi hi baroh kawei.
