Shillong, Lber 07:
U Bah Paul Lyngdoh uba la bam smai kum u Myntri jong ka Sorkar bathymmai u la ong ba ka Kynhun Myntri ha kane ka kynti ka kynthup ïa kito kiba la kham shemphang bad kiba la ih bha ha ka kam.
“Nga kmen ban shakri ïa ki paidbah bad ha kane ka sien ha ryngkat ka Kynhun Myntri kaba la ih bad shemphang ha ka kam, kaba kham bun kiba la nang la stad, ki jingkhmih lynti ki la batai shai lypa,” la ong u Bah Lyngdoh haba kren sha ki lad pathai khubor ha ka Sngi Ba-ar.
Haba kylli kumno ka UDP kan ai ka jingshakri kaba bha lem bad ar ngut ki Myntri jong ka, u la ong, “Ka jingtbit ha ka rukom treikam ka long kaba donkam eh, kam shong ha ka jingbun paid. Phi lah ban don 10 tylli ki tnad treikam bad phim lah ban trei, hynrei phi don uwei u Myntri uba bat ïa 5 tylli ki tnad treikam bad uba trei bha ïa ka kam, kane ka jingïapher.”
Kum ban shu kdew hangne, ka UDP kaba la leit pynïasoh sha ka kynhun ïatehlok hapoh ka jingïalam ka NPP ha kine ki khyndiat sngi ba la dep ka don 11 ngut ki MLA. Na kine ki 11 ngut, ka seng ka la ïoh 2 tylli ki shuki Myntri – Bah Paul Lyngdoh bad Bah Kyrmen Shylla.
Halor ka jingïohi jong u ïa kane ka Sorkar bathymmai, u la ong, “Kumba nga la ong, kane ka Kynhun Myntri kan long kaba ïatreilang ha ryngkat ka jingïatylli. Ka kynthup ïa kito kiba la kham shemphang ha ka kam bad ka long ruh kaba kham bha. Ka dei ka kynhun kaba la angnud ban don.”
La kan don ne em ka jingïabujli Myntri hapdeng ki nongmihkhmat ka UDP, u Bah Lyngdoh u la ong, “Ngam don jingtip eiei halor kane…to ngin pyndonkam hok ïa man la ka shi sngi…to ngin trei mynta ka sngi bad trei biang lashai ka sngi.”
Shuh shuh halor ki jingkylla ba un wanrah, u la bynrap, “Ka Jylla ka dei hok ban ïoh kham bha bad ka jingpyrshang jong nga ka long ban pyndonkam hok ïa kaei kaba u Blei u la ai bad nga ngeit ba kane kan long kumjuh na bynta baroh ki dkhot jong ka Kynhun Myntri.”
