Jakarta, Lber:
Ki la don 11 ngut kiba khlad bad katto katne ngut kiba mynsaw hadien ka jingtwa khyndew hapoh Indonesia namar ka jingther u lapbah ha ka bynta dewlynnong jong katei ka ri ha ka Lah Sngi U Blei.
Ka tnat National Disaster Mitigation Agency ka la iathuh ba katkum ka jingïoh jingtip tad haduh jong ka step Sngi Ba-ar, la lap ia ka metïap jong 11 ngut kiba la ngat bad shah ktah na katei ka jingtwa ka khyndew bad katto katne ngut ruh ki la mynsaw ha katei ka jingjia. Nalor kine, ki don ruh pat sa kumba 50 ngut eiei kiba dang jah bad kiba dang wad tad haduh katei ka step Sngi Ba-ar.
Katkum ki dur ba la pyllait da katei ka tnat, la iohi ia ka ktieh kaba la tap ia ki iing kiba la twa ha ka jingtwa ka khyndew ha ki bynta them jong ka dew lynnong Serasan, kaba don hapdeng jong ka Borneo bad ka Malaysia.
Ha kitei ki dur, la lah ruh ban iohi ia ki bynta ba khyndiat jong ki katto katne ki iing kiba la ngam bad shah tap ha katei ka jingjia.
U nongrah ktien jong ka tnat Disaster Mitigation Agency na ka dew lynnong Riau, u la iathuh ba ki lad ai jingtip na katei ka thaiñ ruh ki la sangeh treikam lut, kumta ruh ym lah shuh ban ioh jingtip thik pa thik halor ka jinglong- jingman ha katei ka jaka tad haduh kane ka kynti.
Namar kumba la iohi tad haduh jong katei ka step, ka jinglong jong ka suiñ bneng ruh ka long ka bym i-tikna, ka lyer ka jur bad ki jingat phyllung ruh ki kham jur ban ia kaba ju long man ka por.
Kumjuh ruh la ong ba ka long kaba eh ban leit iarap bad pyllait im ia kito kiba la leit phet bad sahkut sha ki dew lynnong kiba kham jngai.
Bad lada leit lyngba jong ki lieng kiba stet ruh, kan shim por da kumno kumno 5 kynta eiei ban poi sha kitei ki dew lynnong kiba la kham jngai. Kumta ruh la ong ba ka tnat National Disaster Mitigation Agency kan sa phah da ki liengsuiñ ‘Helicopter’ ban leit pynhap tiar bad ban leit iarap sha kitei ki bynta dew lynnong kiba lah ban shah ktah jur.
La ong ruh ba ka Indonesia ka long ka ri kaba ju mad khah khah ia kum kitei ki jingjia twa khyndew hapdeng ki aïom slap, khamtam ha ki thaiñ kiba ka jingthung dieng ka la duna bad kumjuh ruh ka jinghap slap ba khlem sangeh ka pynlong ia kiba bun bynta jong ka Indonesia ba kan mad pat sa ia ki jingjia shlei um, ha kaba shibun ki paidbah ki ju shah ktah man la u snem.
