Shillong, Lber 07:
U Bah Aubrey Herbert Scott Lyngdoh, uba dei u Myntri Sorkar barim, u la khlad noh ha ka Sngi Ba-Ar ha ka rta kaba 93 snem.
Katkum ka jingpyntip jong ki bahaïing hasem, u Bah Scott, kurim jong i Kong Elvirial Nongkynrih, u la khlad noh ha la ïing ha kane ka nongbah.
Ka jingleit ontep ïa une u rangbah kan long ha ka 9 tarik Lber, 2023 ha ka por 2 baje nohphai sngi na ka ïing sah jong u kaba don ha Pohkseh sha u Lum Jingtep ka Balang Presbyterian Jaïaw kaba don ha Weiking.
Lah ban kdew ba u Bah Scott u dei u ophisar rangbah na ka kynhun IFAS bad u la rung kam ha u snem 1956. Ha u snem 1957, u la long kum u SDO ka Ukhrul ha Manipur bad hadien kata ha Churachandpur naduh 1959 haduh 1961. U la ong u Additional Deputy Commissioner ka Phek naduh 1961 haduh 1963 bad kum u Deputy Commissioner ka Kohima naduh 1963 haduh 1965.
U Bah Scott u la long ruh kum u Development Commissioner ka Arunachal Pradesh ïa kaba la ju tip mynshwa kum ka NEFA bad hadien kata, u la shimti kum u Development Commissioner ka Andaman & Nicobar hashwa ba un wan sha Shillong ban long kum u Chief Executive Officer ka Shillong Municipal Board.
Nalorkata, u la ong ruh u Chief Secretary ka jylla Mizoram bad kum u Chairman ka Delhi Agriculture Marketing Board hashwa ba un shongthait.
Hadien ba u la shongthait, u Bah Scott u la rung sha ka saiñ hima sima ha Meghalaya ha kaba u la long teng kum u MLA ka Jaïaw konstitwensi. U la long ruh u Myntri ha ka sorkar ba la ïalam da u Bah BB Lyngdoh bad Dr FA Khonglam.
