Shillong, Lber 07:
Wat hadien ba kat u Myntri Korbar Ri, u Amit Shah, u la wan shakhmat ban kynnoh ba ka Meghalaya ka wan banyngkong ha ka Ri ha ka bamsap bamngem, ka BJP mynta pat ka la kylla ktien da kaba ong ba kiba kum kito ki jingkynnoh ki ju mih ha ka por ïalap ilekshon da ka jingthmu ban ïoh ‘vote’.
Ïa kane, la pynbna da u National Vice President ka BJP, u M Chuba Ao, uba dei ruh u nongpeit ïa ka seng ha kane ka jylla.
Haba kren sha ki lad pathai khubor ha ka Sngi Ba-Ar hadien ba ki Myntri thymmai ki la bam smai ha Raj Bhavan, u Chuba Ao u la ong ba mynta, ka BJP kam kren eiei halor ki kam bamsap bamngem, hynrei kan pynleit jingmut ha ka kam thaw sorkar bad ban ïatreilang da ka jingïasngewthuh jingmut ban pynïaid ïa ka sorkar.
Hynrei, haba kylli halor ka jingkynnoh u Amit Shah ba ka Meghalaya ka wan nyngkong ha ka jingbamsap, u Chua Ao u la ong, “Kine ki jingkynnoh ki mih ha ka por ilekshon. Ngim lah ban shim khia ïa ki, bad ki jingkynnoh ha ka por ilekshon ka dei tang kumno ban ïoh ‘vote’.”
Lah ban kdew ba ha ka jingleit ïalap ilekshon sha Rilum Garo dang ha ki khyndiat taïew mynta, u Amit Shah u la khyrwit ïa ka sorkar MDA jong u Conrad K Sangma ha kaba u la ong ruh ba ka Meghalaya ka wan nyngkong ha ka bamsap bamngem.
Haba la kylli pat la ka don shisha ne em ka jingbamsap ha ka sorkar MDA ba la leit noh, u la ong, “Ngam lah ban ong eiei namar ha kato ka por, ngam pat da ithuh bha iwei-ïa-iwei pat. Ngi la ïa thaw sorkar ha kato ka por ban pynbiang ïa ki nombor, hynrei mynta pat ngi la kham long ïatylli.”
Ha kaba ïadei bad ka ilekshon, u Chuba Ao u la ong ba ki paidbah ki la dep ban ai ïa ka rai bad ka BJP ka la jop tang ar ngut ki MLA.
La ka BJP ka hun ba ka ïoh tang uwei u MLA ban long Myntri, utei u heh ka BJP u la ong ba yn hap ban peit lang na ka bynta ki seng kiba ïatreilang bad ka BJP kam lah ban shu shim lut halade bad kan hap ban burom lang ïa kiwei.
Lah ban kdew ba la kumba ar snem eiei, ka BJP ha Meghalaya ka la khyrwit tyngeh ïa ka sorkar u Conrad halor shibun bah ki jingkynnoh bamsap bamngem. Na kawei ka por sha kawei pat, ki nongïalam ka BJP ki la mih shakhmat ban kynthoh tyngeh ïa ka sorkar u Conrad.
