Ex. Rev. K. Langrin
Ki samla ki dei kiba dang khie dang san, kiba dang leh shongshit bad tare ruma ia kano kano kaba ki iohi, iohsngew, bad shu bna na ki paralok. Kumta, haba ki leh khlem pyrkhat ia kano kano ka kam teng teng bad bunsien ki bakla bad poi sha ka jingbabe. Ki leh ia kano kano ka kam da kaba shu bud tynneng bad ia bud paralok. Kumta, dei ban don ki ‘riew samla kiba pdiang ia ki jinghikai ki ‘riew tymmen kiba la iohi nyngkong ia ka sngi u bnai bunsien kin poi sha ka thong jong ka jingim kaba bha bad ba jop. Hynrei ki samla kiba rkhie bein ia ki jinghikai ki tymmen kin poi sha ka jah burom, jingjot bad jingbabe ha ki sngi jong ka jinglong tymmen jong ki.
Kum uwei na ki ‘riew tymmen ba la jan dap 60 snem ka rta, nga kwah ban pashat lem lyngba kane ka jingthoh ia phi ki khun samla kumno ban phi dei ban iaid, ban leh bad ban im ha ka por ba phi dang samla. Kita ki long:-
(1) Wat kyrkieh ban beh sha ka jingshongkurim:- Don bun ki khun samla kiba shongkurim khlem pat biang karta bad dang lung ka jingmut jingpyrkhat. Kiba kum kita ki khun samla ha kaba kut kin ngat ha ki shibun ki jingeh bad kin babe sah baroh shirta jong ka jingim jong ki. Ko ki khun samla ka ri jongngi, ban poi sha ka jingshongkurim phi dei ban tip ia kino ki mawjam ba phi dei ban jam. Kine ki long ba nga kwah ban ai jingmut ia phi (i) U Mawjam ba nyngkong u long ka jingnang jingstad : Ko khun samla, hato ka jingnang jingstad jong phi ka la biang ? Lada phim pat ioh ia ka jingnang jingstad, wat pat kyrtiang sha kadiang kamon, hynrei to minot thop ha ka jingpule jong phi khnang ba phin ioh ia ka jingnang jingstad kaba biang. (ii) U Mawjam uba ar u long ka kam ka jam : Ko khun samla, hato phi la don ha ka kam? Hato kata ka kam jong phi ka la biang ia phi ban phin pynlong ia ka iing ba suk ba saiñ? Hato ki khun jong phi kin biang ynda kin leit pule? To phin ioh shuwa ia ka kam kaba ki tymmen kin da i hun. Lada phim pat biang wat ia bud tynneng ia kiwei ban shongkurim kloi.
(iii) U Mawjam uba lai u long ka jingiaieit kaba skhem: Ko khun samla, wat beh kyrkieh sha ka jingshong kurim lada ka jingiaieit jong phi kam pat skhem. Don bun ki samla kiba kyrkieh ban shongkurim kiba ia shong tang khyndiat snem, hadien pat ki iaphet noh bad poi sha ka jingiapyllait san shyieng. Ka daw ka long ba ki iapoi kha khlem pat skhem ka jingiaieit. Ko khun samla, to da pyrkhat bha bad saiñdur ia kane ba ha shuwa ba phin poi sha u mawjam uba saw uba long ka jingshongkurim, phi dei ban da iaid ia kitei ki lai tylli ki mawjam, te ka la biang ia phi ba phin jam noh sa ia u mawjam uba saw uba long ka jingshongkurim.
(2) Wat ia beh than ia ka spah ba shu ioh ei khlem da trei shitom :- Don bun ki khun samla jong ngi kiba la thaw ia ki seng bapher bapher. Ka jingthmu jong ki ka long ban pynbha ia ka ri bad ka jaitbynriew, ban iada ia ka khyndew ka shyiap, ban pynneh pynsah ia ki riti dustur bad kumta ter ter. Pynban don bun ki khun samla kiba rung sha kine ki seng tang ban lum spah. Don ki samla kiba khlem don kano kano ka kam ban trei, hynrei ka pisa pat kim ju kyrduh. Namar ba ki don ha ki seng ba ki ia thaw da ka jingsoh lang jong ki para samla. Nga kum u riew tymmen te ngam sngewthuh shuh nangno ki khun samla kiba khlem kam khlem jam ki iohi pisa kham bun ban ia kito kiba trei kam. Nga iohi ba ka jingioh pisa jong ki khun samla kiba khlem kam ka long ka jingpynjot ia ka jingim jong ki hi. Ko khun samla, to kynmaw ia kato ka jingiathuhkhana shaphang kaba beh ‘kain stem. To kynmaw ruh ia ka jingong jong ki riewstad. ‘Easy come, easy go,’ kaba mut ka pisa kaba wan rung kloi ha ka pla kan mih ruh kloi na ka pla. To kynmaw ruh ba ka pisa kaba wan hap kum u ‘lappraw kan rngad kloi kum ka umsaw. Phi lah ban tei iing tei sem, ban thied kali da ka pisa ba phi ioh ei. Ym don ba kylli ia phi, nangno phi ioh pisa ? Lehse don kiba iaroh ia phi ba phi ioh pisa khlem trei. Hynrei to kynmaw ho ! ba ha ki sngi jong ka jinglong tymmen jong phi, kato ka pisa ba phi ioh ei kan sa khyrwait kylla ia phi. Bad shuwa ban phin iap, ka mynsiem jong phi kan pisa kan lynga. Ko khun samla, nga kwah ban pyni lem ia phi ba ka pisa ba phi ioh da kaba phi pynmih umsyep bad trei shitom kan neh kham slem bad ia ka pisa ba phi shu iohei khlem trei. Sa wad hi ma phi ia ka daw balei ka long kumta.
(3) Wat kwah kiew class khlem a pass bha :- Ko khun samla, kiba dang leit skul, wat kwah kiew class khlem da sngewthuh, khlem da pass bha ia ka examination. Don bun ki samla kiba dang leit skul, kim ju pynshitom ialade ha kaba pule minot. Kim pat ioh ia ka jingsngwthuh kaba biang, pynban ki kwah ban kiew class thymmai noh. Kumta ki thaw bun ki buit tang kumno ba kin ioh kiew class. Kumta ngi ju lap ba ki don ki samla kiba peit tuh kot, kiba shu pan jingiarap na ki paralok bad kiba pyndonkam da ki mobile ha ka por exam. Ha ki skul ha nongkyndong, khamtam ki samla kiba dang hapoh ia ka Class – IX, ki phah leit kyrpad ha ki kmie ki kpa ba ki nonghikai kin pynkiew class thymmai wat haba ki pheil ha ka exam. Ki kmie ki kpa ruh namar ka jingbieit bad jingbym sngewthuh kin shu leit kyrpad ia ki nonghikai ba ki dei ban shah ia ki khun jong ki kiba khlem pass ha ka exam ba kin kiew class thymmai. Ki nonghikai ruh namar ba ki sheptieng ba ioh ka enrolment ha ka skul kan duna noh, bym banse kin shu kohnguh ia ki kmie ki kpa jong ki khynnah. Kumta ynda la plie skul ki khynnah samla kiba pheil kin ioh ban shong class thymmai. Ko khun samla, wat leh kumta, to kiar raidieng raimaw na kaba kiew class khlem sngewthuh namar ka long ka bih ia phi. Ha ka jaka ba phin ioh ia ka jingstad, phin ioh pynban ia ka jingbieit. Kumta, haba phi leit skul, to da minot, da trei shitom bad shim ia ka jingong ‘Haba kiwei ki lah, balei nga ngam lah ?” Haba tang ban khein multiply bad divide phim pat nang, wat kwah ban kiew class thymmai. Ban ia kaba phin ialeh 10 bad 15 snem ia ka class ka bha ba phin shong bun snem ia ki class ba kham hapoh. Wat im tang ka duwai blei khlem pynshi-tom ialade. U Blei U iarap tang ia kiba iarap ialade (kiba pynshitom ialade). Kynmaw ia ka jingong. “God helps those who help themselves” kumno phin hikai ia ki khun jong phi lada ialade phim pynmlien ban trei shitom.
