Aizawl, Lber:
Ki bor sorkar ka tnat pulit jong ka jylla Mizoram ha ka sngi Ba-ar mynta ka taiew ki la pyntip ba ka sorkar ka la weng kam noh ïa u wei u pulit u ba la donkti ban siat ïap ïa 2 ngut ki para pulit ba ïatreilang.
Kat kum ka jingïathuh jong u Inspector General of Police (Headquarters) ka jylla – John Neihlaia u la pyntip ba utei u pulit havildar u ba la tip kyrteng kum u Bimal Kanti Chakma (56 snem ka rta) u la shah kem bad shah pynngat ruh hapoh ka kyndon section 91 (1) (d) jong ka Mizoram Police Act, 2011 (Act No. 3 of 2012) bad hapoh ka rule 1040 (1) (c) jong ka Mizoram Police Manual 2005 ha ryngkat ka Article 311 (2) (b) jong ka Konstitushon. U heh pulit u la pyntip ruh ba na ka liang ka tnat pulit jong ka jylla nalor ka jingweng kam ïa u Chakma, ka la weng ruh ïa baroh ki hok kiba u Chakma u don ïa ka jingïadei bad ka tnat pulit jong ka jylla.
Kat kum ka jingïoh lum khubor la ïathuh ba u Chakma Bimolkanti Chakma u la siat ïap ïa ki 2 ngut ki para pulit ba ïa treilang ha ka 5 tarik mynta u bnai ha ka por kumba 6:40 PM. Kat kum ki jingïoh lum khubor, la ïathuh ba katei ka jingjia ka la jia na ka daw jong ka jingbuaid khawiang jong utei u pulit ‘havildar’.
Ki 2 ngut ki pulit kiba la shah siat ïap ha utei u pulit ‘havildar’ ki kynthup ïa u Indra Kumar bad u J. Lalrohlua, kiba dei baroh 2 ngut na ka 2nd Batallion jong ka tnat pulit Mizoram Armed Police bad kiba trei ïa ki kam pahara jong ki ha ka thaiñ Buarchep – ka thaiñ khappud ba hapdeng ka jylla Assam bad Mizoram.
Na ka liang ki bor pulit jong ka jylla ki la ïahuh ba ki la dep ruh ban pynrung da ka mokotduma hapoh ka kyndon section 302 jong ka IPC pyrshah ïa u Chakma.
Kat kum ka jingïoh lum khubor la ïathuh ba na ka liang ka tnat pulit jong ka jylla kan pynbiang da ka lad jingïarap kaba mar T.1 lak sha ki dkhot longïing jong kitei ki 2 ngut kiba shah siat ïap.
La ïoh jingtip ruh ba na ka liang u Myntri Rangbah jong ka jylla – Zoramthanga lem bad u Myntri ka tnat Kam Pohïing jong ka jylla – Lalchamliana ki la shim da ki lad ki lynti ban pynbiang ïa ki lad jingïarap sha ki longïing jong kitei 2 ngut ki pulit kiba la shah siat ïap.
