Shillong, Lber 07:
Ka Myntri jong ka Sorkar bathymmai hapoh ka jingïalam ka National People’s Party (NPP), Dr. M. Ampareen Lyngdoh ka la ong ba ki seng saiñ pyrthei bapher-bapher ki lah ban don ïa ki jingïapher ha ki jingsngew jong ki, hynrei kam dei pat ban ktah ïa ka roi ka kiew jong ka Jylla.
Haba kren bad ki lad pathai khubor hadien ka jingbam smai ha ka Sngi Ba-ar, ka Dr. Lyngdoh ka la ong ka don ka jingsngew jong ka jingkitkhlieh bad ka long kaba donkam ban pyntikna ban shim khia ïa baroh ki mat ki jur jong ka Jylla.
Ha kajuh ka por, ka la ong ba la dei ban trei minot bad ban ïadon bynta ha kane ka jingpynkhie im biang ïa ka NPP bad ki seng kiba ïatehlok ha ka Sorkar.
“Ngi kum ka kynhun ngi la ïatreilang ha kine ki 5 snem ba la leit, ngam khmih lynti ba kan don ka jingkulmar jingmut namar ngi ïadonlang bad ngi la ïatreilang ha kine ki 5 snem ba la dep. Ngam khmih lynti ïa kano-kano ka jinglong-jingman kaba jyrwit –jyrwat,” ka la ong.
Halor ki jingkylla ba kan wanrah kum ka Myntri, ka Dr. Lyngdoh ka la ong ba watla kam pat tip shai ïa ki kam ba la bate sha ka ne ki tnad treikam kiba kan bat, hynrei ka la kular bad pyntikna ba ki mat ki jura kiba ki paidbah ka Jylla ki la pynsngew la slem mynta, dei ban shimkhia bad pynbeit ïa ki iwei hadien iwei.
Haba ban jur halor ka jingdonkam ban pynskhem ïa ka Sorkar, khamtam hadien ba u paidbah ka Ri-lum Khasi u la ai ïa ka rai kaba long pharia haba ïadei bad ka jingjied nongmihkhmat kaba la pynkhuslai jingmut shi kat dei, ka la ong, “Haba nga pyrkhat ïa baroh, ki seng saiñ pyrthei bapher-bapher ki dei ban ïa rai lang ban ïalam shakhmat ïa ka Jylla…ngim lah ban suki ha ka liang ka roi ka par bad ka jingkiew shaphrang jong ka Jylla bad na bynta ka bit ka biang ki nongshong shnong, ngi dei ban ïatreilang bad phai khmat sha kajuh ka thong.”
“Hooid, ngi lah ban don ki jingïapher ha ki jingsngew, hynrei kine kim dei pat ban ktah ïa ka roi ka kiew bad ka jingkiew shaphrang jong ka Jylla,” ka la ong.
Halor ka jingwan ïashim bynta lang u Myntri Rangbahduh ka ri, u Narendra Modi ha ka jingbam smai ka Kynhun Myntri ka Jylla, ka Dr. Lyngdoh ka la ong, “Ka Meghalaya kam dei shabar ka India, ngi long shi bynta jong kane ka ri bad nga sngewkmen bad sngew burom shi kat dei ban ïadonlang ha kajuh ka rynsan bad u Myntri Rangbahduh namar ngi hap ban ïa jam lang shaphrang bad ka ri baroh kawei.”
Shuh shuh ka la bynrap, “U la tip lypa ïa ka rai kaba u paidbah u la ai…hynrei u la pyllait por ïalade ban ïadonlang, kaba mut ba u shimkhia ïa ka bit ka biang jong ka Jylla.”
