Lucknow, Lber:
Ka kurim jong u runar bashyrkhei ïa uba la tip kyrteng kum u Atiq Ahmed ka Shaista Parveen ka la buh da ka jingujor hakhmat ka ïingbishar jong ka Chief Judicial Magistrate (CJM) ha ka lah sngi U Blei ha kaba ka la ong ba ki arngut ki khun shynrang jong ka, kiba kynthup ïa u Ahzaan bad u Abaan ki la jah.
Ka la ong ba kine ki arngut ki khun shynrang jong ka ki la jah hadien ba ki pulit jong ka Uttar Pradesh ki la rah ïa ki halor ka jingkynnoh ba ki la donkti ha ka ban pynïap ïa u Umesh Pal bad ym shym la ïohi shuh ïa ki naduh ba ki la shahkem.
U Umesh Pal, uba long u nongsakhi uba hakhmat eh halor ka jingjia ha u snem 2005 halor ka jingshah pynïap jong u MLA jong ka seng BSP u Raju Pal uba la shah siat ha ki briew ki bym shym la lah ban ithuh habar ka ïingsah jong u kaba don ha Prayagraj.
Ka jingshah pynïap jong u Raju Pal ka la long hadien ba u la jop ha ka jingïakhun ilekshon na Allahabad (West) Assembly seat ha kaba u la pynrem ïa u para jong u MP barim u Atiq Ahmed u Khalid Azim.
Kane ka jingjai ka lajia hadien ba la don sa uwei pat u nong-siat uba la shah kynnoh donkti ban pynïap ïa u muktiar Umesh Pal, u la shah pynïap ha ka jingleit thwet jong ki pulit bad ka kynhun Special Task Force (STF) ha ka thaiñ Kaundhiyara jong ka Prayagraj distrik kaba ha Uttar Pradesh hynnin ka sngi, la ïathuh ka tyllong khubor kaba la wan na ki pulit.
Ki pulit ki la ïathuh ha ka tyllong khubor ba ki pulit bad ka kynhun STF, kiba la pynlong ïa ka jingleit khynra na ka bynta ban kem ïa u ki la donkti ha kaba ïadei bad ka jingjia jong ka jingpynïap ïa u Umesh Pal, ha kaba la ïoh jingtip ba ki la don kumba katto katne ngut ki runar kiba la rieh ha ka thaiñ Kaundhiyara.
“Kum ka jingpyntreikam hadien ba la ïoh jingtip halor kane ka jingjia, ki pulit bad ka kynhun STF ki la leit ban ker kut ïa katei ka thaiñ bad hukum ïa ki runar ba ki la dei ban pyndem noh ha kaba na ka liang jong ki ki la siat pynban ïa ka kynhun jong ki pulit,” ki la ong.
Kumba la ïathuh ka tyllong khubor kaba la wan na ki pulit, la ong ba na ka liang jong ki pulit ki la pynphai kylla ïa ka jingsiat ha kaba uwei u runar u la mynsaw na ka jingdei kuli, ha kaba kiwei pat ki la lait ban phet na ka daw jong ka jingdum.
“Utei u runar uba la mynsaw u dei u ba la tip kyrteng kum u Vijay Chaudhary ba la tip ruh da ka kyrteng kum u Usman. Une u la shah pynkit sha Swaroop Rani Nehru (SRN) Hospital ha kaba ki doktor ki la pynbna ba u la khlad noh,” ki la ong.
Ka tyllong khubor jong ki pulit ka la ïathuh ba u Usman u la long u runar uba ar ïa uba la shah kynnoh donkti ha ka ban pynïap ïa u Umesh Pal, uba la shah pynïap ha ka por ba la don ka jingïasiat bad ki pulit.
“Hashwa kane, u runar ïa uba la tip kyrteng kum u Arbaz u la shah pynïap ha ka por ba la don ka jingïasiat kaba la jia ha ka thaiñ Jawahar Park kaba hap hapoh ka jingkhmih jong ki pulit ka Dhumanganj. U Arbaz u la long uwei napdeng ki dkhot ka kynhun uba la ñiah ïa ka kali ha kaba ki nongsiat ki la leit sha ka ïingsah jong u Umesh Pal bad u la donkti ruh ha ka jingsiat,” ki la ong.
Kum ban shu pynkymaw, la ong ba u Umesh Pal u la shah siat ïap ha ki runar, kiba la siat pathar khlem sangeh bad kawang ruh da ki bom, hakhmat ka ïing jong u kaba don ha Sulem Sarai ka shnong kaba hap hapoh ka jingkhmih jong ki pulit ka Dhumanganj ha ka 24 tarik, Rymphang.
Uwei napdeng ki nongsynran jong u ïa uba la tip kyrteng kum u Sandeep Nishad u lakhlad noh ha SRN Hospital, uwei pat ïa uba la tip kyrteng kum u Raghavendra Singh u la khlad noh ha ka por ba u dang shah sumar ha SGPGI, kaba don ha Lucknow.
Ki pulit ki la buh da ka jingmudui pyrshah ïa u runar uba la kylla long u riewsaiñ pyrthei bad u MP barim u Atique Ahmed, u para jong u u Ashraf, bad ka kurim jong u ka Shaista Parveen, arngut ki khun shynrang bad kiba bun kiwei pat ki nongïarap.
Ki arngut ki khun jong u Atique ki la shahkem ha ki pulit bad kine ki la shah set ha ka Juvenile Home namar ba ki dang dei kiba poh ka rta ha ka sngi Saitjaiñ.
Ki pulit ki la nang pynkiew shuh shuh ka buskit halor kito kiba donkti ban pynïap ïa u Umesh Pal na ka T. 50,000 sha ka T. 2.5 lak marwei.
