Lahore, Lber:
Ki la don 15 ngut ki khynnah pule na ka jaitbynriew Hindu kiba la mynsaw ha ka Lah Sngi U Blei, hadien ba ki khynnah pule kiba dei na ka jaitbynriew Islamic, ki la pynsangeh bad khang pyrshah ia ki ban rakhe bad pyndep ia ka jingleh niam ‘holi’ ha kawei ka jaka pule jong ka Punjab Province kaba hap ha Lahore jong ka ri Pakistan.
Ka holi ka dei ka jingleh kmen bad rukom leh niam jong ka jaitbynriew Hindu ban buh dak ia ka jingwan poi ka aïom pyrem.
Katei ka jingjia ka la jia hapoh ka skulbah ‘Law’ jong ka Punjab ha ka Lah Sngi U Blei, ha kaba ki don palat 30 ngut ki khynnah pule Hindu kiba la leit ban leh kmen bad leh sngewbha ban kynmaw ia katei ka sngi kumba ki ju leh man la u snem.
Kumta la ong ba ha katei ka sngi, katba kitei ki khynnah Hindu ki dang ialum shi jaka ban lehkmen ia ka ‘Holi’ kumba ki ju leh man ka por, ki katto katne pat ki dkhot jong ka Islami Jamiat Tulba (IJT) ki la leit ban khang pyrshah bad ban pynsangeh jubor ia kitei ki khynnah pule ba kim bit ban leh kmen ‘Holi’ ha katei ka jaka, hadien kata, ka la mih ka jingïakynad bad ka jingia pyni bor markylliang haduh ba kan da poi sha u pud ba kitei ki 15 ngut ki khynnah pule Hindu kin shah pynmynsaw hapdeng katei ka jingleh niam jongki.
Katkum ba la ioh jingtip, la ong ba kitei ki khynnah pule ki la dep ban ioh jingbit na ki bor pyniaid jong katei hi ka jaka pule.
U Khet Kumar, uba la mynsaw ha katei ka jingjia, u la iathuh ba wat ki nong-ap pahara jong katei ka skulbah, ki kyntait ban leh eiei bad ban ai jingiada ia ki ha ka por ba ki leit ban ujor halor ka jingshah khang bad jingpynthud jong ki dkhot ka IJT ha katei ka sngi.
