Patna, Lber:
Uwei u briew u la shahkem ha Jamui distrik kaba don ha Bihar ha ka lah sngi U Blei halor ka jingshah kynnoh ba u pynsaphriang ïa ka khubor thok lyngba ka Video ha ka Social Media halor ka jingpynshisha ba ka la don ka jingthombor pyrshah ïa ki nongtrei bar jylla kiba na ka jylla ha Tamil Nadu, la ïathuh ki pulit.
Ka Economic Offence Unit (EOU) jong ki pulit ka Bihar ki la pynngat ha ki kyndon aiñ ïa une u briew uba la donkti ha kane ka jingjia, la ong ka jingthoh. Ki briew kiba la shah pynngat ha ka kyndon aiñ ha kaba ïadei bad ka jingjia ki dei kiba la tip kyrteng kum u Aman Kumar, Rakesh Tiwary, Yuvraj Singh Rajput bad u Manish Kashyap. U Aman Kumar, u dei u nongshong shnong jong ka Laxmipur kaba don ha Jamui distrik, une u la shahkem noh katba kiwei pat ki dang shah thwet jur, la ïathuh ki pulit.
“Ka jingtohkit jong ka kynhun EOU ka la pynpaw ba une u ba la shah kynnoh u la don bynta ban pynsaphriang ïa kine ki Video thok ba la pyni ba la don ka jingpynïap bad ka jingbom jingshoh ïa ki nongbylla ka Bihar ha Tamil Nadu ha ka Social Media,” la ong ka jingthoh.
Ki la don kumba 30 tylli kiba kum kine ki Video ïa kiba la saphriang ha ka Social Media, ha kaba la pynlong ïa ki nongtrei bylla kiba na Bihar ba kin phet na Tamil Nadu na ka jingtieng jingsyier jong ki, la ïathuh ki pulit. Ïa ki shithi la phah sha ki nongtrei kiba don bynta ban trei ha kine ki jaka jong ki lad phah khubor ba kin khanglad noh ha ka ban pynsaphriang ïa kum kine ki jait Video, kine ki kynthup ïa ki 9 tylli ha ka Facebook, mar 15 tylli ha ka Twitter bad YouTube, bad lai tylli ha ka Gmail -na ka bynta ban bteng ïa ka jingtohkit, ki la ong.
“Ka kynhun jong ki 10 ngut ki dkhot jong ka EOU ki la pynlong ïa ka jingkhmih bniah halor kine ki Video,” la ïathuh ki pulit, ha kaba ki la bynrap shuh shuh da kaba ong ba kito kiba buh ne kiba pynsaphriang ïa kum kine ki Video kum shi bynta ban pynsaphriang ïa ka khubor thok kin sa ngat ha ki jingshah pyntreikam pyrkhing. Ka sorkar Bihar ka la phah ïa ka kynhun jong ki saw ngut ki heh jong ka kynhun sha Tamil Nadu na ka bynta ban ïatreilang bad ki heh pulit kiba la pynlong ïa ka jingtohkit ha kaba ïadei bad kane ka jingjia.
