Guwahati, Lber:
Ha ki khyndiat sngi kiba la leit, ka principal jong ka Diphu Medical College (DMC), Karbi Anglong district, Assam ka la shah kynnoh ba ka la donkti ban shim pisa beaiñ na ki katto katne ki nonghikai jong katei ka kolej. Kat kum ki jingïoh lum jingtip la ïathuh ba ka Dr Sumitra Hagjer, principal jong ka DMC, ka la donkti ban shim beaiñ ïa ka bai ïing na ki katto katne ngut ki nonghikai jong katei ka kolej.
Halor katei ka kam, na ka liang uwei na ki dkhot jong katei ka kolej u la ïathuh ba watla na ka liang ka sorkar Assam ha ka ka jingïalang ka kynhun Myntri ka la rai ban pynbiang ei ïa ka jaka sah na ka bynta ki nonghikai jong ka DMC, pynban na ka liang ka principal Sumitra Hagjer ka la lum T.5,000 na man u uwei u doktor jong katei ka medical college.
Kat kum ka jingpynbna jong ka Tnat Koit Khiah jong ka sorkar Assam ba la pynbna ha ka 29 tarik u Naiwieng, 2019 ka la pyntip ba yn pynbiang ei ïa ka jaka sah na ka bynta ki nonghikai jong katei ka kolej. Ka la pynbna ba ïa ki nonghikai jong ka Diphu Medical yn pynbiang ïa ka House Rent Allowance (HRA) katba ki dang bteng ban hikai ha katei ka kolej; bad kumjuh ruh ïa ka HRA ha kano kano ka jaka kaba ki longïing longsem jong ki nonghikai ki shong ki sah. Ïa katei la pynbna da u Principal Secretary barim jong ka Tnat Health & Family Welfare ka jylla Assam.
La ïoh jingtip ruh ba naduh u bnai Rymphang jong u snem 2022 katei ka principal ka la don bynta ban shim bai ïing beaiñ na ki doktor khlem da pynbiang ïa kino kino ki ‘receipt’.
La ïathuh ba na ka liang ka sorakr Assam ka la rai ban pynbiang jaka sah ei na ka bynta ki nonghikai ka DMC ha ka Members’ hostel jong ka Karbi Anglong Autonomous Council (KAAC). La ïoh jingtip shuh shuh ba ha ka por ba katto katne ngut ki nonghikai jong ka DMC ki la leit ban ïakynduh ïa u CEM jong ka KAAC – Tuliram Rahang, na ka liang ka jong u u la pyntip ruh ba kin lah ban sah ha katei ka ‘hostel’ khlem da donkam ban siew pisa eiei.
Kat kum ki jingïoh lum jingtip la ïathuh shuh shuh ba na ka liang ki bor pynïaid jong ka DMC ki la kyntait ruh ban pynbiang ïa ka ‘pay certificate & salary statement’ sha ki nonghikai kiba la shah pynkynriah sha kiwei ki medical college tad lymda kim shym la lah ban siew ïa katei ka bai ïing.
La ïoh jingtip shuh shuh ba ha ka por ba ki nonghikai jong katei ka kolej ki la pynpaw ïa ka jingpyrshah halor katei ka kam beaiñ, na ka liang ka Dr Hagjer ka la shukor bad ong ba dei ki bor pynïaid ka KAAC kiba la bthah ïa ka ban lum ïa katei ka bai ïing. Hynrei ha ka por ba ki nonghikai ki la leit ban ïakynduh ïa u CEM ka KAAC – Tuliram Rahang u la pyntip ba na ka liang ka KAAC kam shym la ai bor hano hano ban lum ïa ka bai ïing.
