New Delhi, Lber:
Ka kynhun Central Bureau of Investigation (CBI) ha ka sngi Ba-ar ka la poi ha ka jaka sah jong ka MP jong ka seng Rashtriya Janata Dal ka Misa Bharti kaba don ha New Delhi ban leit kylli jingkylli ïa u kpa jong ka bad u heh nongïalam jong ka seng u Lalu Prasad Yadav ha kaba ïadei bad ka jingjia jong ka jingïoh jaka na ka jingïapeiñ bad ka jingai kam.
Ka jingshah khmih bniah jong u heh nongïalam jong ka seng RJD ka la long shisngi hadien ba ka kurim jong u bad ka Myntri Rangbah barim jong ka Bihar ka Rabri Devi ka la shah kylli jingkylli ha ka ïingsah jong ka kaba don ha Patna ha kaba ïadei bad kajuh ka jingjia lajan san kynta.
Ka kynhun jong ki 5 ngut ki dkhot jong ka seng CBI ki la poi ha ka por 10.40 mynstep ha ka jaka sah jong ka Bharti ha Pandara Park kaba don ha Delhi ha kaba u Lalu Prasad, u la leit sah hadien ba u la shah sumar hadien ka jingshah kylliang khyllai.
Ka kynhun tohkit jong ka sorkar kmie ka la dep ban phah lypa ïa ka jingmudui ha kaba ïadei bad ka jingjia pyrshah ïa u Lalu Prasad, ka Rabri Devi bad ïa ki 14 ngut kiwei pat halor ka jingshah kynnoh ba ki la don bynta ban ïasuhbuit sniew bad ki la shah pynngat ha ki kyndon aiñ jong ka Prevention of Corruption Act.
Ka ïingbishar ha Delhi ha ka 27 tarik, Rymphang, ka la pynmih ïa ka hukum ban khot hajir ïa u Lalu Prasad bad ïa ki 14 ngut kiwei pat kiba la shah kynnoh donkti ha ka jingjia na ka bynta ban leit mih hakhmat jong ka ha ka 15 tarik, Lber.
Ha ka lah sngi U Blei, u khun jong u Prasad bad u Symbud Myntri Rangbah jong ka Bihar u Tejashwi Yadav u la ong ba ka jingpynibor pyrshah jong ka kynhun CBI ïa ka longïing jong u ka la long namar ba ka la long pyrshah ïa ka seng Bharatiya Janata Party (BJP).
“Ka dei ka jingshisha kaba la paw pyrthei ba ka kynhun tohkit jong ka sorkar kmie ka la leh ïa kine baroh pyrshah ïa ka seng kaba long pyrshah ïa ka seng BJP bad ïarap ïa kito kiba la mynjur ban ïatreilang bad ka seng,” la ong u nongïalam jong ka seng RJD ha ka jingïakren bad ki nongthoh khubor habar jong ka Bihar Assembly.
U General Secretary jong ka seng Congress ka Priyanka Gandhi Vadra ha ka jingphah jingthoh lyngba ka Twitter ka la ong, “Mynta ka Rabri Devi ka la shah thom da ka bor. U Lalu Prasad bad ka ïing ka sem jong u ka la shah leh donbor da ki snem namar ba kim shym la pynjem ne nguh ka khlieh.”
Ka jingdon jong ka kam bamsap ka la paw ba ka la jia hapdeng u snem 2004 bad 2009 ha ka por ba u Lalu Prasad u la long u Myntri ka tnat Railway ha ka sorkar synrop ba la lamkhmat da ka seng Congress kum ka sorkar kmie.
Ki heh jong ka kynhun CBI ki la ong ba ki la don ki jingkylli kiba thymmai ki ban sa don ha kane ka por ban don ka jingshah tohkit ha kaba ka kynhun tokit kan sa wad bniah halor ka jingleit jingwan jong ka pisa bad ka jingdon jong ka jingïasuhbuit sniew jong kiba bun kiba la shah kynnoh donkti.
