Guwahati, Lber:
Ka ïing kashari jong ka thaiñ Jorhat District, Assam ha ka 6 tarik mynta u bnai ka la pynmih da ka rai ban set patok shi rta jingim ïa ki 11 ngut ki runar kiba la donkti ban pynïap ïa uwei u samla ha ka jingjia kaba la jia ha u bnai Jymmang jong u snem 2020 – ha ka por ba ka sorkar ka dang pynjari da ka jingkhang dam namar ka jingsaphriang jong ka jingpang COVID-19.
U samla u ba la shah pynïap ha kitei ki 11 ngut u dei u ba la tip kyrteng kum u Debasish Gogoi (23 snem ka rta). U la shah pynïap ha ka shnong Nakachari, Jorhat district.U tei u samla lem bad uwei u paralok jong u ki la shah thomor ha kawei ka kynhun paidbah hadien ba ki la kum bakla tynran ïa kawei ka longkmie da ka kali kaba ki ïashong. Katei ka jingjia ka la jia hajan ka karkhana slasha Gabbharu Pahar – ha la por ba kitei ki 2 ngut ki dang wan phai na kawei ka jaka jngoh kai pyrthei kaba don ha katei kajuh hi ka thaiñ.
Hadien katei ka jingshah thombor la ïathuh ba ïa baroh 2 ngut kitei ki samla la leit ban rah sumar sha Jorhat Medical College and Hospital (JMCH), ha kaba u Debasis u la khlad noh na ka daw jong ka jingïoh ïa ki jingmynsaw kiba jur.
Halor katei ka jingjia, la ïathuh ba na ka liang ka tnat pulit jong ka jylla ka la ïoh ruh ban kem ïa ki 18 ngut ki briew kiba la donkti ha katei ka jingjia bad pynrung ruh da ka ‘chargesheet’ pyrshah ïa ki.
