Shillong, Lber 07:
Katba ka jingïabhah ïa ki tnat treikam hapdeng ki Myntri Sorkar ka dang ïaid, ki katto katne ngut ki Myntri ki lah ban ïoh biang ïa kijuh ki tnat treikam kiba ki la peit ha ka por jong ka Sorkar kaba la dep.
Katkum ka tyllong khubor la ïathuh ba u Myntri Rangbah, u Conrad K Sangma un peit biang ïa ka tnat pla tyngka, planning bad kiwei ki tnat kiba khlem bhah sha ki Myntri, katba u Symbud Myntri Rangbah, Bah Prestone Tynsong un peit biang ïa ka tnat shna surok, bad u lah ban peit lang ïa ka tnat pulit lane kane ka tnat ka lah ban poi sha u Bah Paul Lyngdoh.
La ong ba u Bah Paul Lyngdoh u lah ruh ban peit ïa ka tnat pule puthi lane ka tnat pynroi sor lada ym shah khanglad ha u Bah Sniawbhalang Dhar, uba la ju peit teng ïa kane ka tnat ha ka por ka Sorkar MDA-I.
U Bah A.L Hek u lah ban ïoh peit biang ïa ka tnat ka koit ka khiah, katba u Bah Sniawbhalang Dhar u lah ban peit ïa ka tnat ka kit ka bah (transport) bad ka tnat karkhana, katba ïa ka tnat pynroi sor lah ban aiti sha ka Kong Ampareen Lyngdoh kaba la ju peit teng ïa kane ka tnat ha ka por jong ka Sorkar barim, nalor ka tnat Labour bad Municipal.
Ka tnat bording ka lah ban leit sha u AT Mondal namarba u dei uba la kham don jingtip bad shemphang bha ïa ka rukom treikam kane ka tnat namar u la peit teng ha ka por jong ka Sorkar barim, khamtam namarba ïalade u dei u karikor (engineer).
U Bah Kyrmen Shylla u lah ban ïoh peit biang ïa ka tnat social welfare bad excise, katba u Marcuise N Marak u lah ban peit ïa ka tnat ka rep ka riang, bad u Rakkam A Sangma u lah ban ïoh ïa ka tnat ki kam ïalehkai bad kyntiew ïa ki samla samhoi.
U Bah Comingone Ymbon u lah ban ïoh ïa ka tnat PWD (Buildings) bad tnat ri dohkha, katba u Bah Shakliar Warjri, u lah ban ïoh ïa ka tnat SAD, bad PHE.
Hynrei kane ka dei kaba dang don ha ka jingpynbeit da u Myntri Rangbah na ka bynta ban bate kam ïa ki 11 ngut ki Myntri jong u.
